"Nafarroako Gobernuak komunitateko gizarteari Lanbide Heziketaren balio erantsia azpimarratu nahi dio, eta ikasle hauen aurrean ekimen ekintzailea sustatu nahi du, bai eta enpresekiko eta profesional kualifikatuenekiko koordinazioa lortu ere".

Hala laburtu ditu Nafarroako Lehendakari Yolanda Barcinak, San Adriango Ega BHIra egindako bisitan, Foru Gobernuak Lanbide Heziketaren alorrean dituen helburuak. Barcina Lehendakariak, gainera, adierazi du Lanbide Heziketa "funtsezkoa izan dela Nafarroaren garapen ekonomikoan eta gaur egun hala izaten jarraitzen duela", horren adibide dugu "ikastetxe honetan ikasketak amaitzen dituzten ikasleen ehuneko ehunek lana topatzen duela. Une honetan izan dezakegun albisterik onena da".

Barcina Lehendakaria, hain zuzen, San Adriango BHIra jo du ikastetxeak duen instalazio pilotuan jarri berri duen esnekien linea berria dela eta; bertan Lanbide Heziketako zenbait ziklo ematen dira, haien artean Elikagaien Industriena. Izan ere, lanbide-familia horretako zikloak eskaintzen dituen Nafarroako ikastetxe bakarra da, eta ziklo horietan aurten ehun bat ikasle daude.

San Adriango Ega BHIra egindako bisitan, Lehendakariarekin batera zeuden: Hezkuntzako kontseilari José Iribas Sánchez de Boado, Hezkuntza, Lanbide Heziketa eta Unibertsitateetako zuzendari nagusi David Herreros Sota, udalerriko alkate Emilio Cigudosa García eta ikastetxeko zuzendaritzako taldea, Javier Estarriaga Ibiricu zuzendaria buru izanik. Elikagaien Industrien nabe pilotura arteko ibilbidean Lehendakaria geratu eta DBHko Hezkuntza bereziko ikasgela bat bisitatu du.

Ekitaldian ere izan dira zonaldeko industrietako zenbait ordezkari. Izan ere, Lehendakariak bere hitzetan haien presentzia nabarmendu du, eta zentroak zonaldeko elikagaien enpresa handiekin duen lankidetza estua aipatu du; enpresa horiekin praktikak egiteko eta ikasleekin lan egiteko 100 hitzarmen sinatuta daude. Alde horretatik, adierazi du bere Gobernuaren benetako asmoa dela ikasgelak eta enpresak elkar hurbiltzea, eta ikasle nafarrak berrikuntza eta ekintzailetzaren mentalitatearekin prestatzea.

Bisita amaitu da instalazio pilotu horretan egindako produktuekin prestatu den aperitiboarekin.

San Adriango Ega BHIan 662 ikasle daude, haien artean DBHko ikasleak (441), Batxilergokoak (110) eta Lanbide Heziketakoak (92), eta baita gaueko ordutegia duten 20 bat heldu ere. Zehazki, Lanbide Heziketakoek Administrazioa eta kudeaketa (zehazki, `Administrazio Kudeaketa´-ko gradu ertaineko zikloa) eta elikagaien Industrien familietako zikloak egiten dituzte. Azken lanbide-familia horretan gradu ertaineko ziklo bat da (`Elikagaien produktuak egitea´) eta beste bat goi-gradukoa (`Elikagaien industriaren prozesuak eta kalitatea´). Horri, lanbide-familia honetako hasierako lanbide-kualifikazioko bi programa (PCPI) gehitzen zaizkio: bata, `Oinarrizko elikagaien industriaren laguntzaile`-aren oinarrizko modalitatearena, eta bestea, `Elikagaien industria bereziaren laguntzaile´-aren modalitate Bereziarena.