Lehen lehendakariorde eta Lehendakaritzako, Administrazio Publikoetako eta Barneko Departamentuko kontseilari Roberto Jiménez Alli-k Tuterako epaitegien eraikin berria bisitatu du gaur goizean (bertako obrak berriki amaitu dira), eta baita Foruzaingoaren herritarrentzako arreta-bulego berria ere, udalerriko erdigunean dagoena (gaur arratsaldean irekiko ditu ateak).

Epaitegi berrietara egindako bisitan zehar, lehen lehendakariordearekin batera, Nafarroako fiskalaren zuzendari Javier Muñoz: Tuterako alkate Luis Casado; Justizia eta Barneko zuzendari nagusi Inmaculada Jurío eta Tuterako epaile dekano Oscar Sebastián izan dira, beste epaile eta magistratuen artean.

Ekitaldian, Jiménez lehendakariordeak nabarmendu duenez, "datozen asteotan altzariak eraikin berrira eramango dira uda pasata prest egon dadin, eta trantsizio-aldi horretan herritarrei ahalik eta eragozpen gutxiena eragiteko".

Queilesko Ibai Parkearen alboko Albeako bidean dauden Tuterako epaitegi berriak eraikitzeko obrak egiteko 5,2 milioi euroko inbertsioa egin da, Nafarroa 2012 Planaren barnean, eta obrak Huarte Lain SA enpresak eta Construcciones Luciano Elcarte-k osatutako taldeari esleitu zitzaizkion

Warqs Oficina de Arquitectura SLP eta Otxotorena Arquitectos, SL enpresek diseinatutako eraikin berriak 5.356 m2-ko azalera erabilgarria du lau solairutan banatuta (sotoa, behea, lehenengoa eta bigarrena) eta bost epaitegi izango ditu. Gainera, Fiskaltzarako instalazioak ditu, Erregistro Zibilaren bulegoa, guardiako epaitegiko aldea, abokatuen elkargoentzako eta prokuradoreentzako aretoak, artxiboa, garajea eta Foruzaingoaren jendearentzako arreta gunea.

Tuterako epaitegien berrikuntza Nafarroako Gobernuaren Justizia Administrazioa modernizatzeko planaren barnean kokatzen da. Gobernuak bide horri heldu zion arlo horretan eskumenak bere gain hartu ondoren. Harrezkero, Foru Gobernua komunitateko bost alderdi judizialen egoitzak berritzen eta zabaltzen aritu da.

Foruzaingoaren herritarrentzako arreta-bulego berria Tuterako erdigunean

Jarraian, Jiménez lehendakariordea Foruzaingoaren herritarrentzako arreta-bulego berria ezagutu du, gaur arratsaldetik aurrera irekiko dena Erriberako hiriburuko erdigunean, kanpoaldean dagoen komisariara joatea ekidinez horrela.

Foruzaingoaren zerbitzu berri hau Foruen plazan, 5 eta 6 zenbakietan, dagoen Inf012navarra bulegoen barnean dago, nahiz eta kaletik, bereizita sarbide independentea izan. Arretarako ordutegia astelehenetik ostiralera 07:30etik 21:30era da, ordutegi jarraian, eta asteburuetan 07:30etik 14:00etara.

Roberto Jiménez-ek adierazi duenez, "leku horretan salaketak izapidetzeko polizia-zerbitzuak jarrita, ziurta dezakegu Nafarroako Gobernuak Tuteran herritarrei arreta emateko bulego integral bikaina duela, eta Tuterako nahiz Erriberako beste udalerri batzuetako herritarrek beharrezkoak dituzten zerbitzuen zati handiena jasotzen dituela, Foru Komunitatearen Administrazioari lotuta. Horrek beharrezkoak ez diren desplazamenduak ez egiten lagunduko du, denbora aurrezten eta herritarrei erraztasun handiagoak ematen".

Lehen lehendakariordearekin batera izan dira: Foruzaingoaren buru Gerardo Goñi; Justizia eta Barneko zuzendari nagusi Inmaculada Jurío; eta Gobernu Irekiaren eta Teknologia Berrien zuzendari nagusi Guzmán Garmendia.