Nafarroako Gobernuak Nafarroako Elbarritu Ordezkarien Batzordearekin (CORMIN) hitzarmena izenpetu du; hitzarmenak plataforma horrek urte honetan zehar egingo dituen jarduerak arautzen ditu eta haiengatik Foru Administrazioak 105.000 euroko diru-laguntza emango du.

Zehazki, 17 elkartek eta Nafarroako Adimen Urritasuna duten Pertsonen Aldeko Elkarteen Federazioak batzen dituen erakunde horrek aholkularitzako ekintzak garatuko ditu (juridikoa eta orokorra, ezintasuna duten pertsonentzako baliabideen inguruan: lanekoa, osasunekoa, hezkuntzakoa, bekei buruzkoa…),prestakuntzakoak, ezintasuna aztertzeko ekintzak (Behatokia), autonomia sustatzeko eta mendekotasunaren prebentziorako, informaziokoa, ezintasuna ikusarazteko…

Zehazki, 2012ko proiekturako aurreikusitako helburuak honako hauek dira: ezintasuna duten pertsonen, beren familien eta sektoreko erakundeen (aholkularitza juridikoa eta orokorra) kontsulta eta eskaera zehatzei erantzutea; ezintasunari lotutako gaietan interesa duten pertsona nahiz erakunde orori informazioko eta aholkularitzako zerbitzu publikoa ematea; Nafarroan ezintasunaren sektorea ikusarazteko sustapena egitea, erakundeen presentzia eta partaidetza herritarren partaidetzako zenbait organotan koordinatuz; Foru Gobernuarekin eta Nafarroako Udalerri eta Kontzejuen Federazioarekin elkarlanean aritzea ezintasuna duten pertsonei lotutako guztiarekin; hirugarren sektoreko plataforma finkatzea; eta Erakundearen antolaketa-egituran sakontzea hura optimizatze aldera.

Aipatu behar da Nafarroako Gobernuak, Mendekotasunerako Nafarroako Agentziaren bitartez, ezintasuna duten pertsonentzat ia 8 milioi euro bideratzen duela okupazio-tailerretarako, erakundeak diruz laguntzeko eta ezintasuna duten erakundeekin hitzarmen finalistetarako.

Cormin Nafarroan elbarritasunaren plataforma eran jarduten duen Foru Komunitateko erakunde bakarra da. Ezintasunak dituzten pertsonak, haien familiak eta erakunde nahiz elkarteak ordezkatzen ditu beren eskubideen aitorpenean aurrera egiteko eta erabateko hiritartasuna lortzeko gizartean eskubide eta aukeren berdintasunean, hala jasoz beren Estatutuetan eta beren eguneroko jardutean eratu zenetik.