Kanpaina honetako baldintzak 2011koaren oso antzekoak dira. Berrikuntza aipagarriena da arrantzale bakoitzarentzat eskuragarri dauden bost baimenetatik bakarra eskatu beharko dela lanegun batean. 2102ko denboraldi honetan Eska-Salazarko arroan arrantza egin ahal izango da aurreko urteko debekualdiaren ondoren. Eta arrantza-tipologiari dagokionez, Nafarroako Gobernuak "harrapatze eta askatze"-rako ibaiaren kilometro-kopurua hirukoiztu du; kanpaina honetan 15 zati eta bi barruti izango dira, guztira, ibaiaren 58,8 kilometro osatuz, eta bertan arrantzatutako arrainak itzuli egin beharko dira.

Amuarrain helduaren populazioa parametro normalen barnean dago (195 heldu hektarea bakoitzeko), nahiz eta populazio horrek % 29ko beherakada izan duen, batez ere aurreko urteetan arrainkume gutxi izan delako. Nolanahi ere, kanpaina honetan heldu bihurtu diren arrain gazteen kopuru handiak (% 58an igo zen), arrantza-potentziala 2011ko antzeko mailetan mantentzea ekarri du. Arrainkumeei dagokienez, 2011n egindako zenbaketak agerian uzten dute populazioaren dentsitateak % 63an jaitsi dela; beraz, datozen kanpainetan helduen populazioan ondorioak izango dituela espero da.

Izokina arrantzatzeko denboraldia maiatzaren 1ean ireki eta uztailaren 15ean itxiko da edo 48. izokina arrantzatzen denean. Zenbaki hori kalkulatzen da azken urteotan Berako zentralean zenbatutako izokinen batez bestekoarekin. 2011n 500 izokinetik gora erregistratu ziren, eta horrek 2012ko arrantza-eskaintza % 24an igotzea ekarri du.