Nafarroako Gobernuak "pilavesa" izenez ezagutzen den bigarren proiektua funtzionamenduan jarri du gaur goizean. Ekitaldia Iruñeko Baluarte plazan egin da. Aurkezpenaren ondoren, "pilavesa" funtzionatzen hasi da Iruñerriko hiri-garraioko 10.linea osatuz (Belos Garaia-Orkoien) Tres Reyes hoteleko geltokitik abiatuta.

Proiektuaren bigarren fase honetan eguzki-panelak jarriko dira autobusaren sabaian haren autonomia 20-30 kilometrotan handitzeko helburuarekin. Gainera, autonomia handitzea ebaluatuko da funtzionamenduko tenperatura egokia jarriz; izan ere, lehen fasean lortutako ondorioen artean, egiaztatu zen bateriak kargatzeko gaitasuna tenperaturaren arabera aldatzen dela. Ion-litiozko bateria-mota ezberdinekin probak egitea ere aurreikusita dago. "Pilavesa" zortzi hilabetez izango da funtzionamenduan, abenduaren 31 arte.

Gaur aurkeztutako proiektua Nafarroako Gobernuak sustatu eta finantzatuta dago 283.195 eurorekin, Nafarroako ibilgailu elektrikoa (VEN Plana) garatzeko Moderna Planaren barnean eta Nafarroako III. Energia Planaren barnean. Helburua energia lortzeko eta gordetzeko sistema berrietan ikertzea da hiri-garraioko ibilgailu elektriko lehiakorra lortzeko autobus tradizionalen aurrean.

Proiektua honako hauen arteko lankidetzaren emaitza da: Automobilgintzako Berrikuntza Teknologikoaren Nafarroako Zentroa (Citean, Cetena Fundazioarena), Iruñeko eskualdeko hiri-garraioaren emakidadun TCC enpresa eta Foton Europa Motor Pentagon Taldearen bidez, autobus elektrikoaren jabe dena.