Europa osoan 2012ko irailaren 12an ospatuko den Europako Kooperazio Egunaren barnean, Pirinioetako Lan Elkarteak (PLE) "Muga, kooperaziorako gunea" arte-lehiaketa antolatu du. Haren helburua Europar Batasuneko lurraldeko kooperazioa ospatzea da, Europar Batasunaren jarduna lurraldeko kooperazioaren barnean erakustea eta kooperazioa aldarrikatzea Europa eraikitzeko oinarrizko ardatz gisa. Hautagaiek artelan bat aurkeztu beharko dute "Muga, kooperaziorako gunea" gaiaren inguruan.

Lehiaketa POCTEFA lurraldeko kooperazio-programaren barnean sartzen da, PLEak kudeatzen duen programa, eta hautatutako obrekin irailaren 21ean Iruñean erakutsiko den erakusketa ibiltari bat prestatuko da; ondoren, erakusketa PLEa osatzen duten gainerako zazpi entitateetan jarriko da ikusgai: Frantziako hiru eskualdeak (Akitania, Midi-Pyrénées eta Languedoc-Roussillon), Espainiako beste hiru autonomia erkidegoak (Katalunia, Aragoi eta Euskadi) eta Andorrako Printzerria.

"Muga, kooperaziorako gunea" lehiaketa FEDER Europako funtsekin finantzatuta dago Espainia-Frantzia-Andorra 2007-2013 Lurralde Kooperazioaren Programaren (POCTEFA) barnean. Hiru sari iragarri dira:

- Sari nagusia: 3.000 € materialean edo prestakuntzan.
- 14-18 urte bitartekoentzako saria: 1.000 € materialean edo prestakuntzan
- Artista gaztearen saria (18-30 urte artean): 1.000 € materialean edo prestakuntzan

Parte hartzeko baldintzak

"Muga, kooperaziorako gunea" lehiaketa PLEaren lurraldeetan eta alboko zonaldetan bizi diren artista guztientzat zabalik dago: Bartzelona, Tarragona, Zaragoza, Errioxa, Bizkaia eta Arabako probintziak, Espainian, eta Aude, Tarn, Tarn eta Garona, Gers eta Landetako departamentuak, Frantzian.

Lehiaketak bi maila sortu ditu: 14-18 urte artekoa eta 18-30 urte artekoa. Ondorengo mailetarako material malgu edo solidoak erabiltzen dituzten era guztietako artelanak onartzen ditu: pintura, argazkilaritza, argazki-muntaia, marrazketa, prozedura eta teknika mistoak eta eskultura.

Obrak ezingo dira 130 x 100 cm baino handiagokoak izan haren edozein aldetan. Pieza batek baino gehiagok osatutako obra denean haiek guztiak batera zenbatuko dira, gehieneko dimentsioen ondorioetarako. (Kasu honetan jarraibideak erantsiko dira muntaketarako). Eskulturek ezingo dute gainditu 50 cm-ko zabalera eta 70 cm-ko luzera eta ezingo dira 25 kilo baino astunagoak izan. Obrak jatorrizkoak izan behar dira, ez dira aurrez beste lehiaketaren batean sarituak izango eta parte-hartzea banakakoa edo taldekakoa izan daiteke.

Parte hartzeko eskaerak posta elektronikoz egingo dira honako agiri hauek bidaliz: artisten NAN edo AIZaren kopia, hauta daitekeen lurralderen bateko bizitoki- edo jaiotze-frogagiria, curriculum artistikoa (gehienez 2 orrialde), hautagaitza-formularioa eta obraren argazkiak (argazki 1 edo gehienez, 5). Parte-hartzaileek agiri horiek 2012ko ekainaren 30a baino lehen igorri beharko dituzte concours.cooperation@ctp.org helbidera.