Nafarroako Lehendakari Yolanda Barcinak gaur adierazi du ekonomia sozialeko enpresen sektorea (kooperatibak eta lan-sozietateak) "krisi-garai hauetan sektore sendoenetako baten moduan agertu dela eta egoera hain konplikatuari aurre egiteko gaitasun handieneko sektore baten moduan".

Hori dela eta, aipatu du "Nafarroako Gobernuan ekonomia-modalitate horren aldeko apustua egiten dugula. Ez soilik lanpostuak sortzeko duen ahalmenagatik, baita lanpostu horien kalitateagatik ere. Deslokalizazioaren arrisku txikiagoa duten lanpostu egonkorrak dira".

Yolanda Barcinak adierazpen horiek Nafarroako Filmotekan egin ditu Nafarroako Lan Enpresen Elkartearen hogeita hamargarren bilkura orokorraren itxiera-ekitaldian. 2011 amaieran, 168 enpresa eta 3.845 langile zituen. "Datu horiek -aipatu du Lehendakariak- Nafarroako ekonomian duzuen eragina erakusten dute, zuen proiektuak duen sendotasunagatik".

Nafarroako Lehendakariarekin batera, ekitaldian izan da Landa Garapen, Industria, Enplegu eta Ingurumen kontseilari Lourdes Goicoechea eta Foru Parlamentuko lehendakari Alberto Catalán. Parte hartu dute ere, ANELen lehendakari eta lehendakariorde Luis María Gallo eta Jaione Aldaia-k, hurrenez hurren.

Itxiera-ekitaldiaren aurretik, elkarteak 2012tako kudeaketa-plana aurkeztu du eta Josune Bereziartu eskalatzaileak, eliteko kirolaren munduko erreferente batek, bertaratutako guztiei bere esperientzia helarazi die erronkei aurre egiteko garaian.