Nafarroako Lehendakari Yolanda Barcina-k Espainiako Gobernuari Foru Gobernuaren laguntza "irmo eta leiala" eskaini dio gaur "espetxe baten benetako helburuak lortzeko, hau da, espetxean dauden pertsonei arreta egokia emateko, haiek berriz hez daitezen eta pertsonalki gizarteratu eta lanera daitezen".

Yolanda Barcinak adierazpen horiek "Iruñea I" espetxe eta gizarteratzeko zentro berriaren inaugurazio-ekitaldian egin ditu. Ekitaldi horren buru izan da Barne ministro Jorge Fernández, eta harekin batera izan dira, beste agintari batzuen artean, Espetxeetako idazkari nagusi Ángel Yuste; Foru Komunitateko Gobernuko ordezkari Carmen Alba eta Iruñeko alkate Enrique Maya.

115,5 milioi euroko inbertsioa izan duten instalazio berriak Santa Luziako muinoan daude. 1907. urtean eraiki zen San Juan Iruñeko auzoko egungo espetxea ordeztuko du, "denboraren poderioz eta hainbat egiturazko arrazoi nahiz arrazoi funtzionalengatik zaharkituta geratu dena", adierazi du Nafarroako Lehendakariak.

Yolanda Barcinak aipatu du inaugurazio-ekitaldi honekin amaiera ematen zaiola "behar handiko proiektu garrantzitsu bati; Espainiako Gobernuak bere eskumen propioetan oinarrituta egindako proiektua, baina duela hamarraldi askotatik Nafarroako Gobernuak ere sustatu eta babestutakoa". Alde horretatik, gogora ekarri du bi administrazioek 1989an hitzarmen bat izenpetu zutela "ahaleginen bilgunea argi eta garbi zehaztuz".

Horrenbestez, Espainiako Gobernuari eskerrak eman dizkio azpiegitura "berri eta egoki" hori eraikitzeagatik. Bi zentro izango ditu: espetxea bera eta gizarteratzeko zentroa. Lehenengoak bizitzeko 504 gela ditu eta 120 plaza osagarri; gizarteratzeko zentroak, berriz, 50 gela bikoitz eta behaketarako banako beste 3.

Azpiegitura berriak honako ekipamendu hau izango du: garbitegia, okindegia, ikasgelak, liburutegia, kiroldegia, ekoizpeneko, okupazioko eta prestakuntzako tailerrak; haiez gain, senideekin, abokatuekin eta epaileekin komunikatzeko 20 mintzategi, haietako bat mugikortasun mugaturako egokitutakoa.