Nafarroako Lehendakari Yolanda Barcina BSH Electrodomésticos España enpresak Ezquíroz-en (Galar) duen fabrikaren 25. urteurrena ospatzeko antolatu duen ekitaldian izan da gaur eguerdian. Fabrikan bertan ospatu den ekitaldian izan dira, besteak beste, taldearen ordezkari José Longás, eta fabrikako zuzendari José Juste.

Bere hitzaldian Barcinak esan du etxetresna elektrikoen BSH fabrika "funtsezko enpresa" dela Foru Erkidegoan eta bere 25. urteurrenak agerian jartzen duela "ondo egindako lanaren sendotzea". "Zuen erresistentzia guztiontzat eredugarria izatea espero dut" zehaztu du Lehendakariak.

Ezkirotzeko egungo fabrika 1987an hasi zen lehen hozkailuak ekoizten, aurreko jabea –SAFEL konpainiak (Etxetresna elektrikoen Fabrikazioko Sozietate Anonimoa)- bere instalazioen eta langileen zati bat Cordovillatik ekarri zituenean. Bi urte geroago BSH Bosh und Siemens Hausgeräte GmbH talde alemaniarrean sartu zen eta, gaur egun, enpresa horrek Europan, Asian eta Amerikan dituen 42 fabriketako bat da. Guztira 45.000 dira horietan lanean ari diren pertsonak. Hamahiru marka merkaturatzen ditu eta linea zuriko etxetresna elektrikoen hirugarren fabrikatzailea da mundu mailan, urteko 9.654 milioi euroko fakturazio orokorrarekin.

Ezkirotzekoa hotzaren atalari dagokio. Bertako instalazioek 52.000 metro karratu erabilgarri dituzte 194.000 metro karratuko azalera batean, eta 620 langile dituzte, funtsean No-Frost hozkailuen ekoizpenean. Aparatu horien % 50 inguru Europako herrialdeetara esportatzen dira, eta gainerakoak Espainiako merkatuan geratzen dira.