Doikuntzaren xehatzea

Doikuntzetatik lehena Aurrekontuaren 2. kapituluan egingo da (Gobernuaren gastu arrunta). % 11,84ko murrizketa ezartzen da oro har ondasun arrunt eta zerbitzuen gastuetan, hau da, Administrazioaren ohiko funtzionamenduko gastuetan. Kapitulu horretan ondorengo gastuak sartzen dira: horniketak, informatika, publizitatea, garraioa eta bidaiatzeko gastuak, bai eta laguntza teknikoko lanak ere. Kontzeptu horretan 15 milioi euro aurreztea aurreikusten da.

Era berean, Gobernuak % 17,76 murriztuko du Aurrekontuko 4. kapitulutik (transferentzia arruntak), hau da, Gobernuak egiten dituen transferentziak aurrekontu publikotik finantzatutako erakundeen funtzionamendurako. Kontzeptu horretan 47,3 milioi euro aurreztuko da, guztira.

Doikuntzak Gobernuko inbertsioei eragingo die, eta haiek, oro har, % 23,68an murriztuko dira (Aurrekontuaren 6. kapitulua). Inbertsioen kapituluari esker, 25,3 milioi euroko doikuntza egin ahal izango da.

Eta azkenik, Gobernuak doikuntza-politika hori besteentzako inbertsioetara eramango du, Aurrekontuen 7. kapituluan esleituta daudenak (kapitalaren transferentziak). Zehazki eta, oro har, % 19,24ko murrizketa aplikatuko da eta, horri esker, 34,7 milioi euro aurreztuko da.

Langileen arloko doikuntzak

Barcina Lehendakariak azaldu du, halaber, gaur onartutako doikuntzak ez diela eragiten Nafarroako Foru Administrazioko zerbitzuan dauden langileen ordainsariei.

Nolanahi ere, langileen arloan bi neurri hartu dira, eta horrek gastua eustea ekarriko du eta, ziur asko aurrezte ekonomikoa ere, oraindik zenbatu gabe dagoena: sortutako hutsuneen estaldura % 10era mugatzen da; eta funtzio publikoan sartzeko hautaketa-prozesu berriak ez dira deituko (neurri horrek ez dio berriki egin den Erizaintzako oposizioko deialdiari eragingo).

Egitura organikoaren murrizketa eta protokolo-gastuetan aurreztea

Gainera, hedabideen aurreko agerraldian Nafarroako Lehendakariak aurreratu duenez, aginduak eman ditu kontseilari sozialisten esku zeuden hiru departamentuek (laster batean titular berriak proposatuko ditu) beren unitateak berrantola ditzaten egitura murrizteko xedearekin; horren ondorioz kostua aurreztuko da eman behar duten zerbitzuaren kalitateari eta eraginkortasunari eragin gabe.

Honako erabaki honen berri ere eman du: foru-agintari nagusientzat finantzatzen ziren kortesiazko protokolo-gastuak Nafarroako Parlamentutik kentzea, Gobernuko kideenak barne. Nafarroako Gobernuak 50 sarrera erosten zituen San Fermin Feriako zezenketetarako, beste 50 entzierroetarako eta 28 banaketarako, bai eta 18 eserleku ere Osasunak Reyno de Navarran jokatzen dituen Ligako partidetarako, 16 Baluarteko ikuskizunetarako eta beste 6 Gayarre antzokirako. Alor horretan 120.000 euro aurreztuko da.

Datuen etengabeko jarraipena

Gastuaren doikuntza-neurri horiekin, Nafarroako Gobernuak Nafarroako eskualdeko BPGaren % 1,5eko defizitaren helburua betetzera heldu nahi da, gastua 2012an zergen bidezko diru-sarrerak jaistea aurreikusten den kopuru berean txikituz, eskura dauden azken kalkuluen arabera, maiatzari dagozkionak. Nolanahi ere, Nafarroako Gobernuak aurreikuspen horiek gutxienez bi hilean behin eguneratuko ditu, diru-sarreren bilakaerari, gastuen egikaritzeari eta ingurune ekonomiko eta fiskalean izan daitezkeen aldaketei erantzunez, beharrezkoak diren irtenbideak hartu ahal izateko eta defizitaren helburua betetzen dela bermatzen dutenak.