Nafarroako Gobernua bide-segurtasunerako estrategia berria prestatzen hasi da; 2020ra arte luzatuko da eta egun dagoena ordezkatuko du bere indarraldia aurten amaitzen duenean. Foru Gobernuak, Trafikoko Zuzendaritza Nagusiak (DGT) eta udalek Foru Komunitatean arlo horretan gauzatuko dituzten politika eta ekimen guztiak koordinatzeko tresna izango da.

Indarrean dagoen estrategiaren (2005-2012) xede nagusia, Europar Batasunaren zuzentarauei eta Trafikoko Zuzendaritza Nagusiarenei jarraiki, 2001 eta 2011 artean trafiko-istripuetan hildakoen kopurua erdira jaitsiko zuten politika aktiboak gauzatzea zen.

Alabaina, Nafarroan istripuetan hildakoen kopurua %74 murriztea lortu da, 2001ean 108 hildako izatetik iaz 28 hildako izatera pasatuz. Bestalde, Espainian, hamarkada honetan %63ko murrizketa izan da (2001ean 5.517 hildako izatetik 2011n 2.056 hildako izatera) eta Europar Batasunean, %45ekoa (54.352tik 30.108ra).

Errepideetan hildakoen kopurua milioi biztanleko islatuko balitz, datuen arteko alderaketa errazteko, Nafarroa 2001ean 194 hildako izatetik 2011n 43,5 izatera pasa dela ikusiko genuke. Bestalde, Espainia osoan, milioi bat biztanleko 136 hil ziren 2001ean eta 45 pertsona 2010ean; aldiz, Europar Batasunean, 113 pertsona 2001ean eta 60 pertsona 2011n.

Barneko Zuzendaritza Nagusiaren arabera, "jaitsiera garrantzitsu hori" trafikoaren alorrean segurtasun-politika desberdinak hartu direlako lortu da; horien artean, "komunikazio-bideetan azpiegitura-obra garrantzitsuak (Bidearen Autobia, Pirinioetako autobia, Iruñea-Behobia errepidea eta abar) egin izana azpimarratzen da, zeinak, segurtasun handiagoa ekarri duen".

Zentzu horretan, eta adibide gisa, azpimarratu behar da Bidearen Autobia (A-12) inauguratu zenetik bide horretan istripuetan 3 lagun hil direla, denboraldi berean errepide zaharrean (N-111) 27 lagun hil zirenean.