Nafarroako Gobernuak 50.000 euroko diru-laguntza emango dio, langile tituladunez osatutako Nafarroako Pertsona Gorren Elkarteko Zeinu Mintzairaren Interpreteen Zerbitzuari (ASORNA). Haren ordainetan, ASORNAk konpromisoa hartzen du Nafarroako edozein pertsona gor edo entzuleri, eta baita hala eskatzen duen edozein erakunde publiko edo pribaturi, zeinu-mintzarako interprete bat jartzeko; hari esker, pertsona gorren eta entzuleen arteko komunikazioa finkatu ahal izango da edozein ekitalditan edo kudeaketan –partikularra edo kolektiboa-, erakunde publiko edo pribatuen aurrean.

Gaur goizean Gizarte Politiken kontseilari Jesús Pejenaute-k bere bulegoan hartu ditu ASORNAko lehendakari Jesús Zapata; lehendakariorde Sofía de Esteban, gizarte langile Carmen Artileta eta Zerbitzuko interprete Katixa Castellano, bertatik bertara proiektu horren xehetasunak jakiteko asmoz.

Diru-laguntza horrekin, Nafarroako Gobernuak pertsona gorrek zuten aldarrikapenari erantzuten dio, hau da, gizartetik isolatzen duen komunikazio-oztopoak haustea eta gizartean berdintasun-egoeran parte hartzeko duten eskubidea bermatzea

Programa horrekin pertsona gorrek dituzten komunikazio-oztopoak kendu nahi dira, bai eta Nafarroako biztanleak, erakunde publikoak eta erakunde pribatuak sentsibilizatzea ere zerbitzu hori erabiltzeko dagoen beharraz talde horren parte-hartze soziala erraztu ahal izateko.

Programa guztia garatzeko guztira 73.500 euroko aurrekontua dago, eta programan dauden ekintzen barnean ondorengo zerbitzuak daude: interpretazio presentzialak, telefono-deien interpretazioa, testuen itzulpena, ikus-entzunezkoetarako sarbidea eta sentsibilizazioa.