Sustapeneko kontseilari Luis Zarraluqui Ortigosa Baionara joan da gaur arratsaldean (Pirinio Atalantikoak-Frantzia) ZonE 31/64 proiektu europarraren jarraipen-batzordeko bileran parte hartzeko. Proiektu hori Espainia-Frantzia-Andorra Lurralde Lankidetzarako Programak (POCTEFA) sustatzen du eta Pirinioetako Lan Elkarteak (PLE) kudeatzen. Proiektua bideratuta dago, Nafarroako Arangurengo ibarreko eta Akitaniako Mouguerre-ko Centre Européen de Fret-ko industrialdeak errekuperatzeko eta suspertzeko ekintzak egite aldera. Lehengo industrialdeak jarduera ekonomikoko espazio bihurtu nahi dira, industria-jarduerak ez ezik merkataritza-jarduerak eta funtzio anitzeko espazioak jasotzen dituzten espazioak. Nafarroak Nasuvinsa sozietate publikoaren bidez parte hartzen du proiektuan.

Proiektuan aurreikusitako ekintzek, eta aurrekontuetan jasota daudenak, 1.904.587,06 euroko kostua dute, eta kopuru horretatik FEDER Europako funtsek % 65 ematen dute, hau da, 1.237.981,59 euro. Gainerakoa bazkideek finantzatzen dute. Hornidura eta azpiegituren obrek biltzen dute gastuaren zati handiena. 1.061.000 euroko inbertsioa da, hau da, % 56, eta kopuru horretatik 616.000 euro Arangurengo ibarrerako da eta 445.000 Fretes-ko zentro europarrerako.

Industrialde zaharkituak

60ko hamarkadan finkatutako eta 80ko hamarkadatik aurrera hazkunde handia izan zuten Arangurengo ibarreko industrialdeek aldaketa garrantzitsuak dituzte gaur egun, erabilera orokorrean nahiz enpresek garatutako ekintzetan. Hori ekartzen ari da bere azpiegituren, zerbitzuen eta okupatu gabeko alboko espazioen kalitatearen narriadura garrantzitsua.

Zalantzarik gabe, lehengo industrialdeak jarduera ekonomikoaren eremu bihurtu behar dira eredu ekonomiko berriarekin bat etorriz (Nafarroaren kasuan Moderna Planean zehaztuta dago).Nolanahi ere, eremu horietako asko ez dira behar berrietara egokitu, eta horrek ekarri du gertu dauden hiri-eraikin edo hiriguneak utzita geratzea, eta oso zaila izanik haiek birmoldatzea. Proiektuaren helburua da industrialdeak enpresa eta gizarte-behar berrien arabera birgaitzea edo eraldatzea, eta eremu horien kudeaketa-eredu berriak diseinatzea.

Arazo hori konpontzeko, ZonE 31/64k hiru lan-ildo nagusi garatzen ditu: eremu horien azterketa eta diagnostikoa, garapen eta metodologien planak lantzea haiek birgaitu, suspertu eta antolatzeko, eta estrategia berriak probatzea ahalbidetzen duten esperientzia pilotuak abian jartzea. Mugaren bi aldeetako jarduera ekonomikoko eremuen arazo komuna denez, proiektuak mugaz haraindiko izaera partekatua du, eta emaitzak beste lurralde batzuetara transferitzen utziko du.