Ebakuntza konplikatua da zenbait organoren transplantea egiten baita eta zailtasun-maila handia du kirurgia-teknikan nahiz ondorengo beharrezko tratamenduan.

Ebakuntza horiek hesteetako arazoen ondorioz egiten dira, "hesteen porrota" izena duena. Gaixotasun larriak dituzten pertsonak dira eta ez dira gai hesteetatik elikagaiak onartzeko.

Kasu horretan, mutilak nahiz neskatilak bide parenteraletik (zain barnetik) janaria lortzera behartzen dien "hesteetako sindrome laburra" zuten. Egoera horri ezin zaio denbora luzean eutsi gibelean sor daitezkeen lesioengatik, eta errai horien transplante anitza egitera behartzen du gaixoari irtenbidea emateko.

"Hesteetako sindrome laburra" transplante horien arrazoi nagusia da. Honako hauek dira beste arrazoi batzuk: hesteetako patologia autoimmunea, sortzetiko hesteko gaitzak eta tratatu ezin daitekeen diarrea dakartenak, eta hesteetako buxadura nahiz pseudobuxadurako sindromeak.

Lehen sei hilabeteak ezinbestekoak dira transplantea arrakastatsua den ikusteko. Ebakuntza-mota horien heriotza-tasa 5 urtetara % 25ekoa da, eta ratio horiek hobetzeko joera dago.

Nafarroako Ospitale Guneko zuzendariak azpimarratu duenez, Nafarroako zentroko eta Madrilgo La Paz ospitaleko profesionalen arteko jardunbideak "ospitale-zentro ezberdinen arteko elkarlanaren eraginkortasuna probatu eta baieztatu du, eta baita taldeko lanaren arrakasta ere prozesu guztian zehar, gaixoaren arazoak ezagutzen direnetik transplantea eta haren eboluzioaren jarraipena erabaki eta egiten den arte".

Ebakuntzak konplexutasun handia du kirurgia-ikuspegi batetik. 8-10 ordu baino gehiago irauten du, eta La Paz ospitaleko pediatria-kirurgiako zenbait espezialistak esku-hartzen dute. Organo-emaileak transplantearen xede diren organoen funtzionamendu normala duten eta beste arrazoi batzuengatik hildako haurrak dira, eta bateragarriak direnak. Organo-emaile gutxi dagoenez, itxarote-denbora luze samarra da. Kasu horretan, neskatila urtebetez zain egon da eta zazpi hilabeteko haurtxoa, berriz, hiru hilabetez.

Normalean, gaixoa bideratzen den ospitalean (Nafarroako Ospitale Gunea), honako espezialista hauek esku hartu ohi dute: Neonatologia, Pediatriako ZIU, Haur Kirurgia eta Haurren Digestiokoak, kasuen koordinazioaz arduratzen den espezialitatea eta bideratzearen adierazpenaz nahiz transplante aurreko eta ondorengo jarraipenaz arduratzen dena. Helmugako ospitalean (La Paz) espezialitate berberek parte hartzen dute, nahiz eta Haurren Digestioan Gerardo Prieto medikuak zuzendutako Hesteen Errehabilitazioaren berariazko Unitatea den.

Aipatu beharra dago Pediatriako organo-transplante ohikoena gibelekoa dela. Gaur arte 1.500 inguru egin dira umeen kasuan Espainia guztian.