Osasun-sistema publikorako sarrera `Nafarroako osasun-laguntza publikoaren unibertsalizazio-erregimenean sartzeko identifikazio-dokumentu´-arekin aitortuko da, eta Foru Komunitatean bakarrik izango da baliozkoa eta ez du eskubiderik sortuko Europako Osasun Txartela lortzeko. Akreditazio hori Osasun Sistema Nazionalekoak diren aseguratu eta onuradunek dituzten Osasun Txartel Indibidualaren ezberdina izango da eta urtebeteko balioa izango du.

Irailaren 1etik gertatzen denez eta sistema berri horrek funtzionatzen duen lehen bi hilabeteetan –urtarrilaren 10a arte–, Nafarroako Osasun Zerbitzuak osasun-laguntza orain arteko baldintza beretan ematen jarraituko du, dokumentua izapidetu eta lortu ahal izateko xedearekin.

Urtarrilaren 10etik, osasun-zentroek era integralean arreta emango diete eta fondo publikoen kargu OTI duten pertsonei eta dokumentu berria duten titularrei. Foru Komunitatean edo Espainiako gainerako tokietan urtebete baino gutxiago bizi diren eta egoera irregularrean dauden immigranteek oinarrizko osasun-laguntza jaso ahalko dute fondo publikoen kargu larrialdi-kasuetan eta medikuaren alta jaso arte. Gainera, zaintzak jasoko dituzte haurdun, erditze eta erditze ondorengo kasuetan eta gaixotasun larrien kasuetan. Aldiz, 18 urtez azpiko adingabeek osasun-laguntza jasoko dute beti, beste edozein herritar espainiarren antzera.

Aipatu beharra dago, Nafarroako Immigrazioari Arreta emateko Behatokiko datuen arabera, 18 urtetik gorako 2.150 bat immigrante bizi direla Nafarroan era irregularrean (% 1, 65 urtetik gorakoak).

Oro har, osasun-laguntzako sistema publikoan sartzeko eskaerak, bai eta dagozkien tasak ordaintzeko laguntzak ere, sartzeko eskubidea onartuta duen kasuan, osasun-zentroetako gizarte-langileek izapidetuko dituzte (hitzordua eskatu beharko da). Irudi hori ez dagoen zentroetan (Aurtz, Irurtzun, Leitza, Orkoien, Gares eta Erronkari), diru-laguntzak Oinarriko Gizarte Zerbitzuen bidez kudeatuko dira.

Zehazki, unibertsalizazio-erregimenean izango dira, juxtu eskaera aurkeztu aurretik Nafarroako udalerri batean gutxienez urtebetez bizi dela -ohiko bizitoki gisa- egiaztatzen duten herritarrek, eta Osasun Sistema Nazionalaren asegurado edo onuradun izaera ez dutenek. Urtebeteko bizitokiaren baldintza horretatik at daude Osasun Txartel Indibiduala zuten immigranteek edo iragan irailaren 1a baino lehen eskatu zutenek.

Horretarako, 764,46 (64 urte arte) eta 2.675,80 euro (65etik aurrera) artean ordaindu beharko dute gaur egun aitortuta dituzten laguntza-maila bera izateko (Osasun Sistema Nazionalaren aseguratu eta onuradunen prestazio berak, hau da, Nafarroan ezarritako zerbitzu-sail guztia), eta kopuru horrek kontuan hartzen du Nafarroako biztanle bakoitzeko osasun-gastu publikoa, zati bakoitzerako. Estatuan, kuotak 710,40 eta 1.864,80 eurokoak dira, hurrenez hurren, eta kopuru horiekin oinarrizko saila estali ahalko da (farmaziako prestazioa kanpoan uzten da, % 100 ordaindu beharko duena, premiazkoa ez den osasun-garraioa, ortoprotesia…). Ekarpenaren zenbateko urtean behin edo hiru hilean behin ordaindu ahalko da.

Nafarroako Gobernuak diru-laguntza bat emango du –Gizarte Politiken Departamentuak Osasunekoari egingo dion fondoen aldaketa baten bidez– kuota hori ordaintzeko unibertsalizazio-erregimenerako sarrera aitortuta dutenei (Osasun Departamentuaren ebazpena); IPREMa baino diru-sarrera txikiagoak dituztenei (2012an hilean 532,51 eurokoa); aurrekari penalik ez dutenei (gizarteratzeko prozesuak edo birgizarteratzeko tratamenduak ez dira aintzat hartzen); eta diru-laguntzak jasotzeko debekuak ez dituztenei.