Nafarroako Gobernuak 90.000 euroko laguntzak deitu ditu ikasleen etxez etxeko hezkuntza-arretarako eta gaixotasun edo susperraldi luzeagatik ezin dutenak era erregularrean bere ikastetxera joan 2012-2013 ikasturtean. Diru-laguntzen helburua gaitutako irakasleak kontratatzeko beharrak eragiten dien gastua familiei konpentsatzea da, hala beren seme-alabek izan dezaketen desfasea ekiditeko.

Azaroaren 12ko Nafarroako Aldizkari Ofizialean (NAO) argitaratutako deialdian parte hartu dezakete Haur Hezkuntzako (3-6 urte) bigarren zikloa, Lehen Hezkuntza eta DBH funts publikoak dituzten Nafarroako edozein ikastetxetan ikasten ari diren ikasleen guraso, edo legezko tutoreak, baldin eta medikuaren aginduz etxean susperraldian badaude eta ikastetxera ezin badute joan era normalean 21 egun natural baino gehiagoko aldian edo, gaitz kronikoengatik, aldian behingo bajak eta baja jarraituak eskatzen dituztenak, gutxienez sei hilabetez.

Laguntzak banako ebaluazio-erregimenean emango dira; hala, eskaerak aurkeztu ahala izapidetu eta ebatziko dira horretarako aurrekontu-kreditua dagoen bitartean. Aurkezteko epea 2012ko azaroaren 13an zabaltzen da formalki eta 2013ko ekainaren 30a bitarte luzatuko da, nahiz eta irailaren 1etik aurkeztutako eskaerak onartuko diren. Haiek ikaslea dagoen ikastetxean aurkeztu beharko dira.

Etxez etxeko hezkuntza-arreta ikasturtean zehar egingo da. Asteko hezkuntza-arretaren gehieneko denbora bost ordukoa izango da, ahal dela hiru alditan banatuz, Haur Hezkuntzako bigarren zikloko eta Lehen Hezkuntzako ikasleentzat, eta zortzi ordukoa, oro har bi orduko lau saiotan banatuta, DBHko ikasleentzat. Gainera, hilean bi ordu izango dira arreta emandako ikaslearen tutoreen eta etxez etxeko eskolak ematen dituen irakasleen arteko koordinaziorako.