Nafarroako Gobernuak berehala zabalduko die gizarteratzeko errenta, jasotzeko 24 hilabeteak agortu arren, beren kargu 12 urtetik beharreko adingabeak, gaixo larriak edo ezinduak dituzten familia-unitateei; gizarte-etxeetarako laguntza-programetan daudenei; edo genero-indarkeriaren biktimak diren emakumeei.

Hala eman du ezagutzera gaur goizean prentsaurrekoan Gizarte Politiken kontseilari Iñigo Allik gizarteratzeko lan-taldearen bilkuraren amaieran, Departamentuko ordezkariez nahiz sektore horretako gizarte-erakundeez osatuta dagoena.

Allik egindako agerraldian, harekin izan dira ere Iruñeko Caritas-ko Angel Iriarte eta Nafarroako Gurutze Gorriko Joaquín Mencos, eta kontseilariak aipatu duenez, ekimen horrek 800.000 euroko kostua du eta azpimarratu du Nafarroako Gobernuaren asmoa dela "gizarte-erakunde guztiekin lan egitea irtenbideak elkarrekin topatzeko".

Gizarte Politiken kontseilariaren aburuz, Nafarroako Gobernuarentzat "erabateko lehentasuna du biztanleen sektore batek pairatzen duen egoera konplikatu guztiak arintzea". Allik onartu du gizarteratzeko errenta-zabaltze horrek "ez dituela behar guztiak betetzen", baina, aitortu du, "sektore horretako erakunde gehienak ados daudela errealismo-ariketa egin behar dugula pentsatzean".

Aldiz, Iruñeko Caritas eta Nafarroako Gurutze Gorriko ordezkariek Alli kontseilariak aurkeztutako ekimenaren balorazio "positiboa" egin dute, bai eta Gizarte Politiken Departamentuak "gizarte-erakundeekin elkarrizketarako foro bat errekuperatu izanagatik ere".

Asteazken honetan, azaroak 21, ekimen hori Oinarrizko Gizarte Zerbitzuen koordinazio-mahaira eramango da eta Nafarroako Gizarte Ongizateko Kontseiluaren aurrean aurkeztuko da azaroaren 27an.

Gainera, Alli kontseilariak iragarri du datorren urtean Nafarroako Gobernuak laguntzak eskainiko dituela gizarte-erakundeek, enpresek eta toki-erakundeek gizarteratzeko 810 errenta-jasotzaile kontratatzen laguntzeko. Laguntza horri esker, aurten 488 pertsona kontratatu dira.