Nafarroako Gobernuak eta Pirinio Atlantikoetako Kontseilu Nagusiak beste urtebetez koordinatuko dute beren errepideetako garbiketa.zerbitzuak NA-137an eta dagokion zati frantsesean, 132 departamentukoa, Belagua-Pierre Saint Martin zatian.

Bidearen luzera, guztira, 52 km-koa da, eta kilometro horietatik 26 Izaba eta Nafarroako mugaren artekoa da eta beste 26, Pirinio Atlantikoetako 132. departamentuko errepideari dagozkio, Arette eta muga artean. El Ferial eta La Contienda (Nafarroa) eta La Pierre Saint Martin (Frantzia) eski-pisten sarbideko errepide-garbiketan elurrak kentzeko ekipoekin eta turbo fresadorekin elkarlanean aritzea da kontua, eskiatzaile asko joaten diren eski-estazioetan.

Xede horrekin, gaur goizean protokolo bat izenpetu da Belaguako El Ferial Roncalia zentroan, eta Sustapeneko kontseilari Luis Zarraluqui-k eta Pirinio Atlantikoetako Kontseilu Nagudiko Mendiko Ekonomiaren kontseilari nagusi ordezkari Jean-Claude Coste-k izenpetu dute. Ekitaldian izan dira ere, Obra Publikoen zuzendari nagusi Ignacio Nagore; Kontserbazio Ataleko buru Juan Serrano; Izabako alkate Angel Luis de Miguel; Erronkariko ibarreko Batzorde Nagusiko lehendakari Alfredo Cabodevilla eta Pirinio Atlantikoetako Kontseilu Nagusiko zenbait agintari.

Nafarroako Gobernuaren elurra kentzeko ekipoak Erronkarin eta Izaban egongo dira, nahiz eta egoitza osagarri bat egongo den elurra kentzeko makina batekin eta turbo fresa batekin El Ferial-en. NA-137 zatian egingo dute lan, 33+480 kilometroaren (Izaba) eta muga artean (58+990 kilometroa) eta, Pirinio Atlantikoetako Kontseilu Nagusiaren ekipoak ez dauden kasuan, lurralde frantsesean elurra kentzeaz ere arduratuko da Arette-ko pistetaraino, kanpainaren azken fasean.

Aldiz, alde frantseseko elurra kentzeko ekipoak Arette-en egongo dira, La Pierre de Saint-Martin eski-estazioan, eta bide horretako zati frantsesean egingo dute lan. Ekipo frantsesak, Nafarroako Gobernukoekin elkarlanean ariko dira garbiketa-lanak egiten mugatik (58+990 km) El Ferial arte (64+500 km)　 egoerak hori egiten uzten duenean.

Espainiako elurra kentzeko ekipoak egunero abian jarriko dira 07:00etatik 19:00ak arte eta frantsesak 06:00etatik 19:00ak arte. Protokolo horretako arduradunek egunero elkarrekin ebaluatuko dute errepidearen egoera eta irekitzeko baldintzak erabakiko dituzte.　

Nafarroako Gobernuak Arette-ko eski-pistetaraino errepidearen egoerari buruzko informazioa eguneratuko du, Izaban jarriko den informazio-taula aldagarria erabiliz. Horretarako, arduradun frantsesek informazio horren berri emango diote Iruñeko Errepideak Kontserbatzeko Kontrol Zentroari, ordu oro eguneratu beharko dutena.

Protokolo honetan aurreikusitako neguko bidezaintza-koordinazioko operazioak 2012ko azaroaren 29tik 2013ko apirilaren 15a bitarte indarrean jarriko dira, biak barne