Landa Garapen, Ingurumen eta Toki Administrazioko kontseilariak Erroko kontzejuan egindako azpiegitura-obren irekieran parte hartu du gaur goizean. Toki Azpiegituren Plana 2009-2012aren (PIL) barnean dauden obra horiek Nafarroako Gobernuaren 331.676 euroko diru-laguntza izan dute hornidura-sareak berritzeko, kaleen zolaketarako eta argitzapen berria jartzeko, guztira 443.674 euroko inbertsioa eginez. Ekitaldian, harekin izan dira Toki Administrazioko zuzendari nagusi Francisco Pérez Arregui, bai eta kontzejuko lehendakari Iñaki Etxeberría ere; Erroko ibarreko alkate Enrique Garralda ere bertan izan da, beste udal-ordezkari batzuen artean. Ondoren, agintariek Bizkarretako ura erregulatzeko andel berria bisitatu dute, inguruan Ardaitz eta Zilbetikoarekin batera eraiki diren hiru andeletako bat.

Ibarreko zinegotziekin izandako bilkuran, Esparza kontseilariak Erroko ibarreko zinegotzi guztiek egin duten ahalegina azpimarratu du "ibarraren onura ahalbidetzen duten akordioetara heltzeko, gutxieneko udal-zerbitzuak bermatuta izan daitezen".

Sareak berritzea, zolaketa eta argiztapena Erroko kontzejuan

Hornidura-sarea berritzeko lanak hiriguneko mendebaldeko hego-erdialdean egin dira, eliza eta eskolen artean, eta polietilenozko hodiak erabili dira. Gainera, sare-hornidurak kaltetutako kaleak zolatu dira asfalto-zolarekin erdialdean eta hormigoiarekin galtzada-harriekin zintarriztatuz oinezkoen joan-etorrien alboko aldeetan. Halaber, kale horitan euri-uren sarea sartu da, PVC hodiekin. Argiztapen-obrak sareak berritzeko eta zolaketako toki berean gauzatu dira, eta honako hauek izan dira: zeuden aire-lineen ordez lurpeko kanalizazio berri bat jartzea eta elektrizitateko lau puntu berri jartzea (farol artistikoak 4 m-ko altuera duen ornamentazio-zutabearen gainean).

Ura erregulatzeko hiru andel berri Ardaitz, Zilbeti eta Bizkarretan

Gainera, Nafarroako Gobernuak 374.288 euro jarri du Ardaitz, Zilbeti eta Bizkarretako kontzejuetan (Erroko Udalaren barnean daude) ura erregulatzeko hiru andel eraikitzeko eta, horretarako, 475.878 euro inbertitu da. Hiru kasuetan andelen ezaugarri tekniko nahiz eraikitzeko ezaugarriak antzekoak dira: hormigoi armatuarekin eraiki dira bi basorekin eta dagokien giltza-kamerarekin, eta 150 metro kubikoko edukiera dute Ardaitzen eta Zilbetin, eta 180 metro kubikokoa Bizkarretan. Hirurek hartune elektrikoa dute hipokloritoko dosifikatze automatikorako, ura desinfektatzeko. Gainera, Zilbetiko andelaren kasuan, 140 metro luzeko sarbideko bide berria egin da.

Guztira, Nafarroako Gobernuak aipatutako proiektu guztietarako 705.864 euro jarri du.