Nafarroako Lehendakari Yolanda Barcinak Arguedasko ‘Sancho Ramírez’ ikastetxe publikoaren handitzea inauguratu du gaur. Horretarako egin diren obrek 640.583 euroko kostua izan dute guztira (BEZa barne), eta kopuru horretatik 505.000 euro Nafarroako Gobernuak jarri du; gainerako 135.583 euroak, berriz, Udalak finantzatu ditu jantokiko gastuak ordaintzeko.

Barcina Lehendakariak bere agerraldian azpimarratu duenez, "Nafarroako Gobernuak proiektu hau lehentasunezkoa dela iritzi izan du, nahiz eta zailtasun ekonomikoak dauden. Hezkuntzan sinesten dugu eta haren alde egin".

Jarduketaren barnean Haur Hezkuntzako ikasleentzako eraikin berria eraiki da, lehen zegoen blokeari erantsia, eta bertako instalazioak berritu egin dira, erabilera komuneko zonaldeak hobetuz eta eraikin guztian berogailua aldatuz energia-eraginkortasuneko irizpideei jarraituz.

Haur Hezkuntzako eraikin berriak, behe solairukoa dena, 634,49 metro koadro ditu eta honako era honetan banatzen dira: sei ikasgela, ikasleentzako hiru komun ikasgela guztietatik sarbidea dutenak, hainbat erabileratako aretoa, jantokia, atezaindegia, bi komun (bat ezintasuna duten pertsonentzat), sukalondoa, galdara-gela eta korridoreak.

Ikasgeletatik, gainera, 271,96 metro koadro dituen jolastokira joan daiteke, eta haietatik 81,20 metro koadro arkupeek estaltzen dute.

Aldiz, bi solairutako lehengo blokean orain Lehen Hezkuntzako ikasleak daude soilik. Bertako 906,18 metro koadrotan sei ikasgela daude, errekuperatutako espazioak Haur Hezkuntzako haurrak eraikin berrira joan direlako: musika-gela, gutxiengoen gela (arazo sozial, ekonomiko eta kulturalak dituzten ikasleentzat), logopedia, ingeleseko gela eta musika nahiz ikus-entzunezkoen gela, eta erabilera komuneko beste espazio batzuk.

Arguedasko ikastetxe publikoaren handitzea lehentasunezko jarduketatzat jo da zentroak zuen espazio-arazoei irtenbidea emateko; zentroak 25 urte bete ditu 2012an eraiki zenetik.