Nafarroako Lehendakari Yolanda Barcinak, Gizarte Politiken kontseilari Iñigo Allirekin batera, Egüesen izan da gaur, Sarrigureneko Arreta Goiztiarra Emateko Zentro berriaren instalazioak (Garajonai kalea, 49) bisitatzen. Urtarrilaren amaieratik zentro honek heltze-atzeratasuna duten 237 haurri eman die arreta.

Instalazio berria Iruñeko San Jose zentro zaharrean zegoenaren ordez eraiki da, garapen-arazoak dituzten edo izateko arriskuan dauden 0tik 3 urtera bitarteko haurrei arreta emateko, haien behar iragankor nahiz iraunkorrei ahalik eta azkarren erantzuteko xedez.

Zentro honetan arreta ematen zaie garapen biologiko, psikologiko edo sozialean arrisku handia duten haurrei, ume goiztiarrei, atzeratasun ebolutiboa, mugimen-arazoak, asaldura kromosomiko edo sentsorialak, hizkuntza-arazoak edo harremanetarako nahiz komunikaziorako arazoak dituztenei.

Abian jarri zenetik, urtarrilaren 25etik, guztira 237 haur aztertu dituzte, horietatik 147 Iruñeko Haur Garapeneko eta Arreta Goiztiarreko Unitateetatik (UDIAT) bideratuak, 32 Iparraldetik, 26 Tuteratik, 15 Lizarratik, 13 Tafallatik eta 4 Zangozatik. Iruñeko haurren kasuan, gainera, esku hartzen du, baina gainerako haurrei beren eskualdeetan ematen zaie era horretako arreta.

Zentroan 17 profesionalek lan egiten dute, Hezkuntza, Osasun eta Gizarte Politiken departamentuetako teknikariekin koordinatuta. Eskaerak normalean iristen dira osasun-alorretik (neonatologiako, neuropediatriako, errehabilitazioko, otorrinolaringologiako, aurpegi-masailetako kirurgiako, osasun mentaleko eta pediatria-lehen mailako arretako zerbitzuak), gizarte-zerbitzuetatik (UDIAT), hezkuntzatik (haur-eskolak, eskolatzea) eta familiak eskatuta.