Nafarroako Gobernuak baimendu du Osasunbidea-Nafarroako Osasun Zerbitzuko osasun-zentroetan Energia Aurrezteko Eraginkortasun Plan bat abian jartzea. Estrategia honek 35 neurri jasotzen ditu epe labur, ertain eta luzera, lau multzotan bilduta: tarifen optimizazioa; instalazioen hobekuntza; eta langile eta erabiltzaileen sentsibilizazioa.

Osasun kontseilari Marta Verak prentsaurrekoan azaldu duenez, autonomia-erkidegoen artean Nafarroa lehenetakoa izan da laguntza-esparru guztietako –Lehen mailako Arreta, Osasun Mentala eta Laguntza Espezializatua- osasun-zentroetarako energia-eraginkortasuneko dokumentu estrategiko bat onartzen.

Planaren helburua energiaren kontsumo eraginkorra sustatzea da, ekoizpeneko eta transformazioko azpiegituren zentzuzko kudeaketa eraginkorrean aurrera egitea eta, birgaitzearen bitartez, eraikin publikoen isolamendua hobetzea.

Mantentze-lanetako zenbait arduradunek eta Osasunbideko energia-kudeatzaile batek osatutako lan-talde bat aurreikusi diren epe laburreko zortzi neurriak sustatzen ari da jada. Mantentze-lanetako unitateek ekiteko moduko jokabide errazak dira eta beren kostua ekitaldi berean amortizatzen da (% 3ko aurrezkia, 210.000 euro inguru urtean).

Hala, zentroen kontsumoak aztertu ondoren, haien energia-kontratazioa aztertzen hasi dira – adibidez, kontratatutako potentzietan egin diren lehen doikuntzekin 33.000 euro aurreztu dira- eta elektrizitateko, gas naturaleko eta C gasolioko operadoreekin akordio-markoak lortzen ari dira.

Dauden instalazioak optimizatzeko (lanparak, aire-aparatuak, etab.), erabilera gutxiko orduetan kontsumoak murriztea edo eskaeraren araberakoa izatea ahalbidetzen duten sistemak jartzen ari dira: ordutegiaren araberako kanpoko argiztapena; ebakuntza-zonetan airea berritzea; etab.

Era berean, datozen asteetan lan-taldeak aurrera egingo du erosotasun-tenperaturen normalizazioan, Eraikinetako Instalazio Termikoen Araudia betez. Araudi horren arabera, udan tenperaturak 23 eta 25 gradu artekoa izan behar du eta neguan 20tik 23 gradura bitartekoa. Halaber, Ospitaletako Airea Girotzeko Instalazioen UNE 100713 araudiak xedatzen duenez, ospitaletan tenperaturak 24tik 26 gradura bitartekoa izan behar du.

Lan-taldeak zehaztuko du lan-eremu bakoitzerako tenperatura egokia, bakoitzaren erabileren eta okupazioaren arabera (eremu komunak, gaixoak dauden ala ez, etab.). Klimatizazioa eremutan banatuz, eremu bakoitzean tenperatura neurtu eta kontrolatzeko sistemak erabiliz, haizagailuen abiadurak erregulatuz edo ur-ponpak erregulatuz energian % 20-30 aurreztea lor daiteke. 1 graduko aldaketa batek klimatizazioan % 6 eta % 10 artean aurreztea ahalbidetzen du. Gainera, kontuan hartuko da kanpoko tenperaturarekiko 10-12 graduko aldeak osasunarentzat kaltegarriak direla.

Aurreikusitako beste neurri bat da langileen eta erabiltzaileen artean ingurumen-kontzientziazioko kanpaina bat egitea, klimatizazioan, argiztapenean eta ur-kontsumoan aurrezteko aukera ematen duten keinu txiki batzuk barneratzeko xedez: behar ez diren argiak itzaltzea, lanpostuan tenperatura erregulatzea, erabiltzen ez diren orduetan aparatuak itzaltzea, etab.