Nafarroako Lehendakari Yolanda Barcinak Noaingo Intermodal Terminalaren (TIN) inaugurazio-ekitaldiaren buru izan da gaur. Logistika-zentro hori iragan urritik Bartzelonako portuko BEST (Barcelona Europe South Terminal) edukiontzien terminalarekin trenez lotuta dago, Europako itsasoko terminal moderno eta eraginkorrenetako batekin, hain zuzen.

Zerbitzu berriak Foru Komunitateko industria-sareari mesede egingo dio, Europako portu nagusietako baten bidez produktuak inportatzea eta esportatzea errazten baitu. Gaur egun, zama-maiztasuna asteko tren batekoa da. Nolanahi ere, egun gutxi barru bi lotura-tren izango direla aurreikusten da, bakoitzak 70 TEUtako ahalmenarekin (20 oineko edukiontziak) eta 20 orduko zirkulazio-denborarekin, eta zenbait hilabetetan astean hiru tren izatea espero da.

Barcina Lehendakariak bere agerraldian azpimarratu du azpiegitura horrek zer garrantzi duen Nafarroarentzat, bere izaera esportatzaileagatik nabarmentzen dena, eta adierazi du zerbitzu berriak agerian uzten duela "jarduera ekonomikoa izaten jarrai daitekeela", krisi-garaian egon narren. Halaber, Foru Komunitateak tren bidezko garraioaren alde egindako apustua azpimarratu du, horrek enpresa-sektoreari ematen dizkion abantaila lehiakorrekin.

Noaingo Tren Logistika Zentroan dagoen azpiegitura Iruñeko Garraioaren Hiriarekin eta Espainiako iparraldeko beste hiri batzuekin lotuta dago (Zaragoza, Irun, Logroño, Bilbo…) errepidez. Hortik datorkio intermodal-izaera hori, operazioak trenez eta errepidez integratzen dituelako. Gainera, aurreikusita dago etorkizunean Prestazio Handiko Trenarekin lotura izango duela eta Frantziako hegoaldearekin operazio-zentro balioko duela Kantauri-Mediterraneoko korridorearen bidez.

Logistika-zentroarekin Nafarroako enpresen lehiakortasuna hobetuko dela uste da, treneko garraioa sustatzean. Renferen azterketa baten arabera, tren bidezko salgaien garraioarekin % 40 eta % 50 artean aurrezten da, eta % 20 kamioia-trena intermodalitatea nahastean. Gaur egun, Nafarroara heltzen edo handik abiatzen den salgaien ia garraio guztia errepidez egiten da.

Inaugurazio-ekitaldian izan dira: Sustapen kontseilari Luis Zarraluqui; Iruña (Enrique Maya), Noain (Oscar Arizcuren) eta Galarko Zendeako (Cecilio Lusarreta) alkateak; Adif-eko Logistika Zerbitzuen merkataritza-zuzendari Ignacio Sanz Junoy; Bartzelonako Portu Agintaritzako lehendakari Sixte Cambra; Catalunya Terminaleko zuzendariorde nagusi Guillermo Belcastro (TIN kudeatzen duen enpresa); eta Nafarroako GIMEX logistika-enpresako zuzendari Ángel Tellechea.