Lurraldearen Antolamendu Batzordeak (COT) argi berdea eman dio Udalaz Gaineko Eragina duen Proiektu Sektoriala aldatzeko txostenari Plazaolako lehengo ibilbidea errekuperatzeko, Iruña-Irurtzun zatian.

Plazaolako zati hori errekuperatzeko proiektua Plazaola Turismo Partzuergoak sustatu zuen 2010ean herritarrek erabili ahal zezaten aisialdi-jardueretarako, eta Nafarroako Gobernuaren akordio bidez onartu zen 2010eko maiatzaren 10ean. Nolanahi ere, Aitzoain eta Sarasako kontzejuek hala eskatuta, Plazaola Turismo Partzuergoak COTi gaur onartu den txostena igorri dio, UGPSren bi zatitan ibilbidea aldatzea proposatzen duena. COTek aldaketa horien aldeko txostena egin ondoren, Nafarroako Gobernuari igortzen zaio hark onar dezan eta jarraian jendaurrean nahiz entzunaldian jartzeko kaltetutako toki-erakundeen aurrean.

Lehen aldaketa Aitzoaingo Oronsospeko auzo-inguruan planteatu da, eta bigarrena Sarasako hiriguneko inguruetan. Aitzoaingo Kontzejuko lurraldean, indarrean zegoen UGPSak bide berdea Oronsospe auzoa Berriozar udalerriarekin lotzen duen asfaltatutako pista erabiltzea aurreikusten zuen bitartean, pistan motordun ibilgailuen zirkulazioa areagotu denez ibilbideak bereiztea ekarri du era askotako zirkulazioa aldi berean izatearen ondorioz sor daitezkeen gatazkak direla eta.

Horregatik, proposamen berriak motorrik gabeko ibilgailuen joan-etorrirako plataforma bat eraikitzea planteatzen du pistaren hegoaldeko albotik, egungo galtzadaren paraleloan. Nolanahi ere, Oronsospeko auzora heldu aurretik, azken zatian, bi modalitateek pista berean joan behar dute, bi ibilbideak independente egiteko arrazoizko aukerarik ez baitago.

Bestalde, Oronsospera iristean, 2010ean onartutako ibilbidea jauregi aurreko espazio publikoaren lorategiz hornitutako eremuetan sartzen zen; orain, berriz, Aitzoaingo Kontzejuaren ekimenez, ondorengoa planteatzen da: bide berdearen ibilbidea Berriobeitiko katastroaren 15. industrialdeko 42. eta 51. lursailen artean dagoen jabari publikoko espazioan joan dadin.　

Aldaketa Sarasan

Sarasako Kontzejuan (Itzako udalerria) indarrean dagoen UGPSak aurreikusi zuen, lehengo trenbidearen ibilbidea N-240A errepidearen paraleloan zihoan zatian, ibilbidea bertan dagoen gasolindegi baten instalazioen atzean kokatuko zela, ondoren Sarasako udalerriko hirigunean sartzeko herrian sartzeko dagoen errepidearen paraleloan doan ibilbidearen bidez.