Nafarroako Gobernuak iritzi du Lege-aurreproiektuan edukiak daudela Toki Administrazioaren arrazionalizaziorako nahiz iraunkortasunerako, Nafarroak LORAFNAren 46. artikuluan Toki Administrazioaren arloan aitortua duen eskumen-erregimena uki dezakeena.

Arrazoi hori dela eta, Landa Garapen, Ingurumen eta Toki Administrazioko kontseilari Jose Javier Esparzak azaldu du Foru Gobernuak Administrazio Publikoen Estatuko Idazkaritzari txosten bat bidaliko diola, eta bertan aurreproiektu horri aldaketak egiteko zenbait irizpen eta proposamen jasoko direla, bi bloketan elkartuta: alde batetik, foru-erregimenean zer eragin duen eta, bestetik, egin nahi den Estatuko erreforma hori, egun izapidetze parlamentarioan dagoen Nafarroako Toki Administrazioa berrantolatzeko Foru Legearen proiektuarekin bateragarria den.

Lehen alderdiari dagokionez, Esparzak adierazi du Nafarroako Gobernuak aurreproiektuaren testuan faltan sumatzen duela, Nafarroako foru-erregimenari zor zaion errespetuaren berariazko aitorpena; gai horrek kezka sortzen du eta, bere iritziz, argitu beharra dago; beraz, aitorpen hori barnean sartzeko eskatuko du egungo aurreproiektuaren aurretiazko zirriborroetan jasotzen zen moduan.

Nafarroako Gobernuari ere kezka eragiten dio "kontzejuen" toki-erakundearen izaera kentzeko aukerak etorkizuneko Legea indarrean sartzen den unean. Izaera hori kenduz foru-erregimena zuzenean ukitzen dela interpreta daiteke, Nafarroan dagoen kontzejuen antolaketa Foru Komunitateak dituen eskumen-tituluan oinarritzen baita, toki-erakundearen izaerarekin erakundeak sortzeko eta arautzeko LORAFNAren 46.1 artikuluan aitortuta dituen eskubide historikoak oinarri izanik.

Hirugarrenik, Estatuko Kontu Hartzailetza Nagusiarekiko Nafarroako toki-erakundeetan esku-hartzailetzako funtzioak betetzen dituzten langileen menpekotasun funtzionalak ere, aurreproiektuko arrazoien azalpenean aurreikusitakoa, Foru Komunitateak funtzio publikoaren arloan duen eskumen historikoarekin talka egin zezakeen. Egindako azterketarekin bat etorriz, menpekotasun horrek Estatuarekin egindako Itun Ekonomikoaren Zazpigarren Xedapen Gehigarrian ezarritakoarekin talka egingo zuen; hark, toki-erakundeek aurrekontuen egonkortasun eta finantza-iraunkortasun arloan araudia betearazteko kontrola ematen dio Foru Komunitateari.

Toki Administrazioaren berrantolaketako Foru Legearen proiektuaren eta Toki Administrazioaren arrazionalizaziorako eta iraunkortasunerako Lege-proiektuaren arteko bateragarritasunari dagokionez, lehenengoan proposatzen diren jarduketa-ildoak Nafarroako toki-administrazioaren egungo egitura berrantolatzera bideratuta daude, gutxietsi gabe –alderantziz–, Estatuko erreformarekin lortu nahi diren helburu estrategikoak. Hori dela eta, Nafarroako Gobernuak uste du, hasiera batean bi testuak bateragarriak direla.