Zigilua nola lortu

Aitorpen hori lortzeko, urtero deialdia sortuko da, eta bertara gizarte-zerbitzuen arloko irabazi-asmorik gabeko erakundeak aurkeztu ahal izango dira, egoitza soziala Nafarroan dutenak edo Foru Komunitatean ordezkaritza iraunkor bat dutenak gutxienez duela bi urtetik, zerga-betebeharrak egunean izanik eta inolako debekutan sartuta egon gabe.

Zigilua ematea eskatzen duten proiektuak proiektu sozialak izan beharko dira, Nafarroatik antolatutakoak eta pertsonen oinarrizko eta premiazko beharrei zerbitzuak nahiz laguntzak emateko bideratutakoak. Ez dira onartuko honako honetan oinarritzen diren proiektuak: arlo orokorreko gizarte-zerbitzuen sailak bermatutako prestazio gisa aurreikusitako jarduerak egitea.

Halaber, proiektuek kudeaketako eraginkortasun, gardentasun eta kalitateko baldintzak bete beharko dituzte, 2013an egikaritzen hasi beharko dira eta hainbat urtetarako izaera izan ahalko dute.

Honako hauei zuzendutako programek lekua izango dute: drogazaleei, gizarte-baztertuei, gurasobakarreko familiei, familia ugariei, gatazka-egoeran dauden familiei, gatazkan eta gizarte-zailtasuneko adingabeei, babesik gabeko egoeran dauden espainiar nazionalitateko adingabeei, inoren laguntzarik ez duten atzerriko adingabeei, indarkeria matxistaren biktima diren emakumeei, gutxiengo etnikoei, presoei, preso ohiei eta menpeko sozialei, adinekoei, buruko gaixotasun larria duten pertsonei eta ezintasunen bat duten pertsonei.

Programaz baliatuko ahalko dira ere: prestaziorik gabeko langabeei arreta emateko programak, eta herrialde azpigaratuetako behar handieneko herrien aldeko nazioarteko garapenerako lankidetzakoak, bereziki gerra-gatazkaren bat jasaten ari diren edo jasan duten herrialdeena edo ezbehar naturalek gogor kaltetutakoena.

Programaz baliatu ahalko dira ere, Autonomia Pertsonalaren Legea garatzeko laguntza-programak, eta emakume nahiz gizonen aukera-berdintasuna sustatzen duten ekintzen garapenari laguntzeko programak ere.