Nafarroako Gobernuko Miguel Servet Fundazioa-Navarrabiomed-ek osasuntsu dauden pertsonen DNA bilduma bat osatu du; horri esker, ikertzaileek lagin horiek gaitza duten beste batzuetatik jasotakoekin erkatu ahal izango dituzte; hala, gaixotasunen prebentzioan, diagnostikoan eta tratamenduan aurrera egin ahal izango da.

Emaile osasuntsuen DNA-bilduma (kontrol-subjektu izenekoak) Nafarroako Odol eta Ehun Bankuarekin (BSTN) egindako akordioari esker lortu ahal izan da; banku hori astero odol-emateetatik etorritako odol-hondarrak bidaltzen hasi da.

Osasunbidearen zerbitzu horrek 21 emaile aktibo ditu gaur egun, eta Nafarroan, egunero, 100 eta 140 odol-emate inguru egiten dira. Odol-osagaiak prozesatzean ikerketan erabil daitezkeen `hondarrak´ sortzen dira: edukia analisien hodietatik, soberakinak ehunak prozesatzeko nahiz odola zatikatzeko prozesuetan eta abar.

Navarrabiomed, aldiz, DNA ateratzeaz arduratzen da; hura aztertzeko baldintza egokietan kontserbatzeaz (-80 gradutan izozten da); eta kostu-prezioan banatzeaz ospitale, unibertsitate, bioteknologia-zentro eta beren lana gaixotasunak ezagutzera bideratutako enpresen ikerketa-taldeei.

Navarrabiomed-en asmoa da epe ertainean Foru Komunitateko odol-emaile gehienek ikerketa biomedikuari ere laguntza desinteresatu eskaintzea. Aipatu behar da emaileen eskubideak bermatzeko, Bankuak aurretiazko oniritzia jasotzen duela eta Navarrabiomedi laginak ematen dizkiola anonimotasuna gordez (sexuaren eta adinaren gaineko informazioa bakarrik mantentzen da). Aurrez, Biobankuko batzorde zientifiko eta etikoak ikerketa-proiektuak ebaluatu eta lagina lagatzea baimentzen dute.

DNA-bildumari esker, aurrera egin ahal izango da, dibertsitate genetiko eta genomikoaren gaineko ikerketan (Giza Genoma Proiektua), zenbait gaixotasun eragiten dituzten gene-aldaketaren ezagutzan eta baita gaitz horiek izateko gizabanakoek dituzten aukeretan ere.

Gainera, "medikuntza pertsonalizatua" izenekoa erraztuko du, eta haren ondoriozko aurrerapena jomuga terapeutiko berrietan eta, azkenik, Nafarroako biztanleriaren osasun-patroiak ezagutzen ere lagunduko du (nagusi diren gaitzak, indarguneak…).