Nafarroako Gobernuak guztira 13.755.489 euroko gastua onartu du gaurko bilkuran babestutako sektoreetan enplegu-politiken sustapenari lotutako hiru programa egin eta diruz laguntzeko: 6,55 milioi enpleguaren zentro berezietarako (langile ezinduen soldatak finantzatzeko laguntzak); 5 milioi diru-laguntzen deialdi bat, lehiaketan, sustatzeko enpleguaren lantegi-eskoletarako; eta 2,2 milioi babestutako enplegu soziala sustatzeko deialdiari jarraipena emateko (gizarte-bazterketa egoeran dauden pertsonentzat).

Babestutako sektoreetan enpleguaren sustapenari lotuta Nafarroako Gobernuak gaur hartutako erabakietan lehenengoa 6.545.687 euro onartzea izan da, enpleguaren zentro berezietan ezinduak diren pertsonak betetzen dituzten lanpostuei dagozkien soldata-kostuak finantzatzeko.

Gaur egun SNEk kalifikatutako 17 zentro daude eta ezintasun-maila ezberdina duten 1.300 pertsonari lan ematen die. 2012an 6.669.500 euroko laguntzak jaso zituzten, guztira. Onartutako diru-laguntza zentro guztietako langileen lanbide arteko gutxieneko soldataren % 50i dagokio (diru-laguntzaren % 80) eta osagarriari 11 zentrotako 400 langileren % 75 arte, ezintasun-maila handiagoa dutenak (diru-laguntzaren % 20).

Gogoratu behar da 2012an egin zuen moduan, Nafarroak osagarri horri eusten diola lanbide arteko gutxieneko soldataren % 75 arte, Estatuko araudiak nahitaezko portzentaje hori % 50era murriztu ondoren. Administrazio publikoek egitera behartuta dauden ekarpena % 75 arte handitzen duen autonomia erkidego bakarra da.

Gainera, Foru Gobernuak 5 milioi euroko gastuaren bigarren erabaki bat hartu du, kasu honetan hainbat urtetarako, 2013 (2 milioi euro), 2014 (2 miloi euro) eta 2015 urteetan (1 milioi bat euro) Enpleguaren Lantegi Eskolen programak finantzatzeko. Programa bateratu berri horrek bakar batean elkartuko ditu 2006an abian jarri ziren lantegi-eskolak (25 urtetik beherakoentzat) eta enplegu-tailerrak (iraupen luzeko langabeentzat).

Nafarroako Gobernuak orain baloratu du jarduketa horiek ez zeudela pentsatuta gaur egun dauden egoera eta enplegu-tasetarako, eta enpleguaren politika aktiboak egoera berriei egokitu behar zaizkiela.

Hori dela eta, Foru Gobernuak `Enpleguaren Lantegi Eskolak´ izeneko programa berri hori landu du; hura deialdi berri batean eta oinarri arautzaile berrietan sostengatzen da, eta prestakuntza nahiz enpleguaren programa horiek sustatzen dituzten instituzio zein erakundeetarako baremo eta baldintza bateratuak sartuz.

Urte honetatik aurrera, deialdia lehiaketa bidez egingo da, hau da, banaka eta objektiboki baloratuz programari atxiki daitekeen proiektu bakoitza, bere eskaera aurkeztean emandako datuen arabera.