Nafarroako Lehendakari Yolanda Barcina AKÍ enpresak Foru Komunitatean zabaltzen duen lehen establezimenduaren inaugurazioan izan da gaur, Tuteran. Brikolajean, lorezaintzan eta dekorazioan espezializatutako dendak 36 lanpostu sortuko ditu, 21 zuzenean eta 15 zeharka.

Lehendakariak azpimarratu du "enplegua arazo nagusia den garai hauetan, 36 lanposturen sorrera jaso dezakegun albiste onena dela".

Gainera, adierazi du, denda horren irekiera azken hilabeteotan Erriberan sustatutako beste zenbait enpresa-ekimeni gehitzen zaizkiela, esate baterako: Uvesa enpresak jarritako oilaskoen inkubagailua, Saiona kooperatibaren esnekiak prozesatzeko fabrika eta Maher taldeak Cintruenigon jarritako fabrika berria; jarduera horiek guztiek "Nafarroaren aberastasunari" lagunduko diote.

4 milioi euroko inbertsioa behar izan duen establezimenduak ostegunean, martxoak 7, zabalduko ditu ateak jendearentzat. Colmar ibaiaren bidean dago (A68-Corellako errepideko 94. irteera), salmentarako 2.900 metro koadroko azalera du eta 220 aparkaleku ditu.

Inaugurazioan izan dira ere: bigarren lehendakariorde eta Kultura, Turismo eta Erakundeekiko Harremanetarako kontseilari Juan Luis Sánchez de Muniáin; Nafarroako Parlamentuko lehendakari Alberto Catalán; Tuterako alkate Luis Casado; Espainiako AKÍren zuzendari nagusi Frédéric Capdeville; eta AKÍren zuzendari Iñaki Unzueta.