Nafarroako Gobernuak Kanbon (Lapurdi-Frantzia) antolatu den mugaz haraindiko jardunaldi batean parte hartu du aste honetan. Bertan guraso bakarreko familien egungo errealitatea aztertu du Euskal Autonomia Erkidegoko eta Pirinio Atlantikoetako eskualde frantseseko ordezkariekin.

Aipagarri da Foru Komunitateko familien % 1,8 guraso bakarrekoak direla; Espainia guztian, berriz, % 7, EAEn % 8,3 eta Frantzian, kopuru guztiaren % 20.

Guraso bakarreko familiak dira gurasoetako bat seme-alabekin bizitzen denean eta haietaz arduratzen denean, bakar-bakarrik. Familia horiek osatzen dira, bereziki, ezkontzak eteten direnean, alarguntzagatik edo amatasuna bakarrik izaten denean.

Pax Christi mugimendu katoliko eta bakezale frantsesak antolatutako topaketan parte hartu dute: Nafarroako Gobernuko eta Eusko Jaurlaritzako ordezkariek eta, Frantziaren aldetik, Pirinio Atlantikoetako Kontseilu Orokorreko ordezkariek, Kanboko Udalekoek, Baiona eta Seignanx-eko Familiei Laguntza emateko Zentrokoek eta Apprentis d´Auteuil fundazioko ordezkariek.

Diru-laguntzak eta laguntzak Nafarroan

Nafarroako Gobernuaren aldetik topaketan esku hartu du Nafarroako Familiarako eta Berdintasunerako Institutuko Familia eta Haurrei nahiz Nerabeei Arreta emateko zuzendariorde Agustín Oyaga-k.

Bere agerraldian, Oyagak iragarri du Nafarroako Gobernuaren asmoa dela guraso bakarreko familiei diru-laguntzen eta laguntzen berariazko ildo bat sartzeko aurten egingo den familiei eta haur nahiz nerabeei arreta emateko hurrengo Planean.

Era horretan, saritutako enpleguari lotutako ekintzak aztertuko dira beren amatasunaren ondoren emakumeak kontratatzeko, eta baita adin txikikoak dituzten guraso ezkongabeak, banandutakoak edo alargunak kontratatzeko ere. Gainera, kenkari fiskalak sustatu nahi dira eta 0-3 urte arteko haurrentzako zerbitzuak areagotu, malguak direnak eta beren gurasoen lan egoerei egokitzen zaiena. Azkenik, guraso bakarreko familiak familia ugariek lortzen dituzten eskubide eta abantailekin parekatzeko aukera izan dezaten jasotzen da.