Nafarroako Gobernuak Eusko Jaurlaritzarekin zuen lankidetza-konpromisoa apurtutzat jo du gaur; konpromiso hori euskal autonomia erkidegoko telebista Nafarroan hartzeko izenpetu zen, 2009an bi komunitateen artean sinatutako lankidetzako protokolo orokorraren barnean.

Iragan asteburutik, Eusko Jaurlaritzaren euskarazko eta gaztelaniako telebista-kanaleek erakusten dituzten meteorologia-mapek Euskal Autonomia Erkidegoa eta Foru Komunitatearen arteko lurralde-batasun bat erakusten dute (lurralde frantsesak ere barnean hartuz), eta Nafarroako Gobernuak egoera hori bi komunitateen errealitate instituzionalaren aurka doala irizten du eta hauteskunde bakoitzean nafarrek aldarrikatzen duten borondate politikoaren aurka jotzen duela.

Nafarroako Gobernuak uste du euskal erakunde publikoaren aldetik egindako aldebakarreko jarduketa horrek 2009ko autonomia arteko akordioa ez duela betetzen. Gogoratu behar da ETB Nafarroan hartzeko konpromisoaren hirugarren klausulak ondorengoa dioela: "ETBren emisio guztietan Nafarroako errealitate politiko, sozial eta instituzionala, ikurrak eta bertako identitatea errespetatuko dira, indarrean dagoen ordenamendu juridikoa betez eta Konstituzio Auzitegiaren 94/1985 Epaia, uztailaren 29koa, betez. Nafarroako Foru Komunitatea Euskal Autonomia Erkidegotik eta bertako lurralde historikoetatik bereizita aurkeztu eta ordeztuko da ETBren profesionalek emandako informazioetan, haien aurkezpenetan eta bertako alderdi grafikoetan".