Hala eman du ezagutzera prentsaurrekoan gaur goizean Gizarte Politiken kontseilari Iñigo Allik, foru-estrategiaren eta gazteria-planaren zirriborroaren aurkezpenean eta Nafarroako Gobernuko kideei horren berri gaur asteazkenez egin den ohiko bilkuran eman ondoren.

Nafarroako Kirol eta Gazteria Institutuak Nafarroako Gobernuaren departamentu guztien parte-hartzearekin landutako agiri horrek 207 ekintza jasotzen ditu, 117,9 milioi euroko aurrekontua du hiru urtetarako eta honako arlo hauek jasotzen ditu: hezkuntza, enplegua, mugikortasuna eta nazioartekotzea, etxebizitza, osasuna, ongizatea eta bizi-kalitatea, gizarte-gaiak, pertsonen arteko harremanak eta Administrazioarekin dagoen parte-hartzea eta harremana.

Haien artean azpimarratu behar dira gazteek enplegua izatearekin lotutako ekintzak (19,9 milio euroko aurrekontua), ekintzailetza eta autoenplegua sustatzen dituztenak (2,8 milioi), laguntza gutxien dituzten gazteen gizarteratzea errazten dutenak (49,7 milioi), egoneko ohiturak murrizten dituztenak (18,4 milioi), gazteen trebetasunak eta gaitasuna hobetzen dituztenak (17,3 milioi) eta artea nahiz kultur ohiturak sustatzeko eta garatzeko direnak (1,9 milioi euro).

Adierazgarria da etxebizitza izatea errazteko jarduketa ere (2,1 milioi euro). Horretarako, etxebizitzak birgaitzeko gazteentzako diru-laguntzak % 3ko gehigarriarekin saritzea aurreikusten da.

Halaber, honako ekimen hauek nabarmentzen dira: jokabide kritiko eta arduratsuak sustatzekoak kontsumoaren aurrean (956.000 euro), elkartasuna nahiz gizarte-konpromisoa sendotzekoak (941.000 euro), parte-hartze soziala sustatzekoak eta Administrazioa gazteei hurbiltzekoak (683.000 euro) eta Nafarroako administrazio publikoen artean administrazio artekoa hobetzekoak eta elkarlanekoak (482.000 euro).

Foru-estrategiaren eta gazteria-planaren zirriborroa behin egin ondoren, Nafarroako Gobernuak herritarrei parte hartzeko aukera emateko prozesu bat ireki du ondorengo helburuarekin: gazteek, gazte-eragileek eta gainerako herritarrek agiri horri ekarpenak egin diezazkioten.

Era horretan, iragan astean zehar Nafarroako Kirol eta Gazteria Institutuak hiru informazio-bilkura egin zituen gazteen informatzaileekin, aisialdiko eskoletako profesionalekin eta gazteria-teknikariekin. Gainera, aste honetan gaikako lau bilkura izaten ari da osasuna eta ongizateko, hezkuntzako, emantzipazioko eta gazteen partaidetzako adituekin.