Osasun Departamentua plan bat lantzen ari da Nafarroan gaur egun dauden 120.000 gaixo kronikoen bizi-kalitatea hobetzeko, Foru Komunitateko biztanleria guztiaren % 17,28 dena. Ekimen horrekin gaixoaren autonomia eta gaitasuna sustatu nahi dira, informazioa emanez eta autozainketa sustatuz, bai eta esku-hartzeko zirkuitu berriak ezarri ere; hala, hainbat espezialistarekin beharrezkoak ez diren kontsultak ekidingo dira.

"Gaixo kroniko eta patologia asko dituzten pertsonentzako arreta integratuaren estrategia" izenarekin ezagutzen den planaren zirriborroa Osasun kontseilari Marta Verak eta Osasuneko zuzendari nagusi Cristina Ibarrolak aurkeztu diete gaur goizean Foru Komunitateko sozietate zientifikoei, osasun-alorreko profesionalen elkargoei eta gaixoen elkarteei, haien iradokizunak eta ekarpenak jasotzeko.

Helburua osasun-arretako egungo eredua atzean utzi (era larrian aurkezten diren osasun-arazoen arretarako bereziki sortuta dagoena) eta laguntza-mailen artean arreta integratua eta zainketetan jarraikortasuna eskaintzen duten beste batera pasatzea da. Arretako eredu berria bihotz-gutxiegitasuna eta dementzia duten patologia askoko gaixoen kasuan 2013. urte honetan ezartzea aurreikusten da.

Estrategia Osasun Departamentuaren arreta-eredu berriaren barnean sartzen da. Eredu hori funtsezko hiru zutabetan oinarritzen da: osasun-emaitzen hobekuntza, emandako zerbitzuaren kalitatea eta sistemaren iraunkortasuna. Xede horiek erdiesteko zazpi ildo estrategiko zehaztu dira eta lehentasunezko 40 proiektu identifikatu, eta haien artean dago "Gaixo kroniko eta patologia asko dituzten pertsonentzako arreta integratuaren estrategia"

Estrategiaren asmoa gaixoari esku-hartze integrala eskaintzea da; hala, dituen patologien inguruan medikuaren diagnostikoa eta tratamendua kontuan hartzeaz gain, gaixoaren zainketetan dituen beharren eta haren gizarte-beharren ekintza-plana ere aintzat hartuko da.

Gainera, gaitzen autozainketa eta autokontrolerako estrategia sustatzen du funtsezko elementu modura, gaixoak prestatuz, informatuz eta gaituz osasun-sistemarekin erantzulekide izan daitezen beren gaixotasunak erabiltzeko eta kontrolatzeko orduan. Helburua da gaixoak beren gaixotasunaren kontrolean era aktiboan inplika daitezela, eta horrek osasuneko emaitzak hobeak izan daitezen lagunduko du.

Halaber, gaixo kroniko larriagoentzat, esku hartzeko zenbait zirkuitu diseinatzen dira eta, haiei esker, gaixo kronikoen kontrol hobea lortu ahalko da, beraien benetako beharrak kontuan hartuz, hainbat espezialistarekin beharrezkoak ez diren kontsultak ekidinez, ikuspegi integralagoa ahalbidetuz eta beren patologietan dagoen deskonpentsazioagatik sarrerak murriztuz.