Nafarroako Enpresa Korporazio Publikoaren Administrazio Kontseiluak (CPEN) Sektore Publikoa Berrantolatzeko II. Plana onartu du gaur. Plan horrek bost jarduketa-ardatz handi jasotzen ditu: bere egitura murriztea, 13 enpresetatik 8ra jaistea; kostu eraginkorrak murriztea, higiezin aktiboak eta beste aktibo batzuk saltzea eta enpresen zorra murriztea, eta kontseiluen berrantolaketa nahiz aurreztea.

2013an eta 2014an garatuko den ekimenak 83 milioi euroko eragin ekonomiko positiboa izango du. Kopuru horretatik, 15 milioi kudeaketa hobetzen eta kostuak aurrezten lortuko dira eta 68 milioi inguru higiezin aktiboak eta beste aktibo batzuk salduz.

Bigarren prozesu horrekin, balio erantsi handiko enpresa-sektore publiko bati eustea bermatu nahi da, giza kapitalari eutsiko diona, eta Foru Komunitatearen garapen ekonomikoari laguntzen utziko duena, haren tamaina egokituz, egitura optimizatuz eta eraginkortasuna hobetuz.

Plana gaur goizean onartu du CPENen Admnisitrazio Kontseiluak; kontseilu horretakoak dira, Nafarroako Gobernuko eta Foru Parlamentuko ordezkariak eta baita ospe handiko profesionalak ere. Zehazki, Nafarroako Gobernuaren aldetik, bertan izan dira, Yolanda Barcina Angulo Lehendakaria, lehen lehendakariorde eta Ekonomia, Ogasun, Industria eta Enplegu kontseilari Lourdes Goicoechea; eta departamentu horretako Aurrekontuen zuzendari nagusi Juan Franco Pueyo. Foru Ganberako ordezkariak Anai Astiz Medrano, Koldo Amezketa Díaz eta Judith Hualde Irigaray izan dira. Ope handiko profesionalen artean, Kontseiluko kide dira: Nafarroako Unibertsitateko Ekonomia-Zientzien Fakultateko dekano Reyes Calderón Cuadrado, eta Irumold-eko zuzendari nagusi Javier Antoñana Gastesi. Bilkuran CPENen zuzendari nagusi Jorge San Miguel Induráin ere izan da.

Helburu ekonomikoez gain, dokumentuak antolaketa-mailako zenbait xede ere finkatzen ditu eta, haiei esker, Administrazioaren eta Nafarroako gizartearen egungo eskariei erantzun hobea emango zaie, enpresako ekintza publikoaren egungo estaltzea eta sakabanaketa ekidinez.

Nafarroako enpresa-sektore publikoaren berrantolaketari 2011. urtean ekin zitzaion. Jarduketen bigarren pakete hori behin aplikatuta, enpresa-kopurua % 79 jaitsiko da (38tik 8ra), gerente-kopurua % 77 (30etik 7ra) eta kontseilari-kopurua % 82 (332tik 59ra). Aldiz, soldata-masaren murrizketa askoz txikiagoa izango da: % 28 (52,1etik 37,4 milioi eurora).

Aipatu denez, planak bost jarduketa-ardatz finkatzen ditu eta 2013 eta 2014an garatuko dira.

1. Nafarroaren enpresa-garapena. Sodena eta Ceinek egingo dute, enpresa berezigarri moduan mantentzen direnak, baina zuzendaritza bakar batekin kudeatuta.
2. Lehen sektorearen garapena, INTIAren bitartez.
3. Ingurumen-sektorearen garapena. Horretarako, Nafarroako Ingurumen Kudeaketak eta Nilsak bat egingo dute, 2014an.
4. Higiezin-aktiboen eta etxebizitza-politiken kudeaketa. Nasuvinsak, Tuterako Nekazaritza Elikagaien Hiriak (CAT) eta Nafarroako Garraio eta Logistika Agentziak (ANL) osatutako enpresa berri batek egingo dute. Haien bat-egitea bi fasetan egingo da.
5. Aisialdiko eta kulturako zerbitzuen kudeaketa. Sozietate berri batek burutuko du, Navarra Deporte y Ocio, eta Navarra Espacios Culturales enpresen bat-egitearen emaitza dena.
6. Administrazioari zerbitzu teknologikoak ematea. Beren egitura bereizgarria duten Tracasa eta Nasertic enpresek egingo dute.