Lehen lehendakariorde eta Ekonomia, Ogasun, Industria eta Enplegu kontseilari Lourdes Goicoecheak2013-2016 aldirako Nafarroako Nazioarteko Plan (PIN) berria aurkeztu du gaur Nafarroako enpresa-sektorearen nazioartekotzea sustatzeko. Plan hori Foru Komunitateko alor horretan parte hartzen duten instituzio, erakunde eta entitate publiko nahiz pribatu guztien ahalegin bateratuaren bitartez landu da. Aurkezpenean José Antonio Sarría (CEN), Isabel Peñaranda (ICEX) eta Amaya Errok ere (Nafarroako Ganbera) parte hartu dute.

Planak 85 ekintza jasotzen ditu eta haien artean azpimarratu behar dira: kanpoko merkatuetara irteteko orduan enpresak batzeko laguntzen deialdia, Nazioarteko Lizitazio Programaren jarraipena Nafarroako Ganberaren laguntzarekin, eta ICEX estatuko sozietate publikoaren programei aholkularitza osagarriak eskaintzeko laguntzak.

Plana kanpoko sektoreak Nafarroaren hazkunde-eredua orekatzeko duen garrantzia aitortzetik abiatzen da, Komunitateko ekonomiari egiturazko indar handiena ematen duen alorra baita. 2008-2011ko aurreko PINaren aldean, hazkunde ekonomikoko egoeran egin zena, plan berria egungo egoera ekonomikoari egokitu behar zaio, eta garapen iraunkorrari lagunduko dioten epe ertain eta luzeko helburuak finkatzen ditu. Hala, 2020an Nafarroako enpresek 10.000 milioi euroko balioa duten esportazioak egin ditzaten nahi da, egungo 7.016 milioien aurrean eta, horrez gain, esportatzaileak diren entitateak 1.000ra hel daitezen egun dauden 708 entitateen aldean.

2013-2016 aldirako Nafarroako Nazioarteko Plana landu da Nafarroako Gobernuaren, ETEen, eta nazioartekotze-arloarekin zuzenean lotutako erakunde, instituzio eta eragileen artean (AIN, Nafarroako Ganbera, CEN, ICEX, Moderna fundazioa, SODENA, NUP eta Nafarroako Unibertsitatea) izandako partaidetza eta lankidetza-prozesu zabal baten bitartez.

85 neurriak lau ardatzen inguruan antolatzen dira: enpresak kanpora irteteko emandako laguntza; Nafarroaren interesa sustatzea atzerritik bertan inberti dezaten; enpresen eta herritarren sentsibilitatea eta gaitasuna, eta orokorrean, zeharkako ekintzak eta ekimenak, alde batetik, planaren ekintzak ezagutzera emateko eta Nafarroako nazioartekotzean herritarren eta enpresen partaidetza areagotzeko; bestetik, inplikatutako hainbat eragile jarraitu eta koordinatzeko.

Atal hori helburu bikoitz batean oinarritzen da: enpresa esportatzaileen kopurua handitzea eta merkatu berriak zabaltzea. Nafarroako Gobernuak sustatutako ekimenak nabarmendu behar dira enpresak prestatzeko, laguntzeko eta haiekin elkarlanean aritzeko nazioarteko laguntza eta lizitazioetarako sarbidea errazagoa izan dezaten, bai eta beraien arteko elkarlana eta lankidetza sustatzeko ere kanporako irteera arrakastatsuagoa erraztearren.

Zehazki, laguntza ekonomiko osagarriak deituko dira (sustapen-gastuak) aholkularitza pertsonalizatuaren bidez esportazioan hasteko ICEX Next programan jada sartuta dauden enpresentzat. Gainera, enpresen arteko lankidetzarako laguntza-deialdiak aurreikusita daude kanpora irten daitezen eskualde-mailako ekintzen finantzaketa bidez, negozio-prozeduran hobekuntzak egiteko eta elkarrekin nazioartekotzeko; eta aholkularitza espezializatua (juridikoa, kontabilitatekoa, finantza-mailakoa eta langileen hautaketa) finantzatzeko esperientzia esportatzailea duten enpresetan.

Nazioarteko Lizitazio Programarekin ere jarraituko da (Nafarroako Ganberarekin batera). Programa horren bidez, Nafarroako enpresei laguntza ematen zaie nazioarteko lizitazioen merkaturako sarrera errazteko.