Nafarroako Gobernuak Lehendakaritza, Justizia eta Barne Departamentua lantzen ari den foru-legearen aurreproiektuaren berri izan du gaur. Haren bidez, gaueko ordutegian, 22:00etatik 09:00ak arte, edozein alkoholdun edariren salmenta debekatuko da xede horretarako baimendutako establezimenduetan, baina edariak berehala kontsumitzeko ez direnak.

Gaur egun, Nafarroan 1.269 establezimendu daude alkohola saltzeko baimenarekin. Neurri horrekin, Foru Komunitateak debekua jada aplikatzen ari diren beste hamaika autonomia erkidekorekin bat egin du.

Departamentuaren helburua da araua uda honetan bertan indarrean sar dadin eta, bereziki, Sanferminak baino lehen, nahiz eta azken epe hori ezin den bermatu; izan ere, hura izapidetzeko garaian, dokumentuak hainbat erakunderen oniritzia behar du: Adingabekoen Kontseiluarena, Merkataritza Kontseiluarena eta Toki Erregimeneko Foru Batzordearena, Foru Parlamentura bidali baino lehen.

Muga berria martxoaren 16ko 10/1991 Foru Legearen 4. artikuluaren aldaketa baten moduan antolatzen da, adingabeek alkoholdun edariak kontsumitzeko prebentzioari eta mugari buruzkoa dena.

Alde horretatik, aurreproiektuaren testuak Nafarroako Gobernuak mendekotasun-sortzaileak diren jokabideen prebentzio eta soluzioaren inguruan duen sentsibilitatea gogoratu du eta, horretarako, bi ekintza-mota garatu ditu. Alde batetik, 1970ko hamarkadaren amaieratik, alkoholismoa eta beste toxikomania batzuk artatzeko programak eta zerbitzuak abian jarri ditu. Bestetik, lege-mailako garapena egin du 10/91 foru-lege horren bidez, adingabeei alkohola ematea debekatzen duena.

Nolanahi ere, dokumentuak eransten duenez, denbora pasa ahala ohitura eta erabilera sozial berriak sortu dira eta, hori dela eta, beharrezkoa da honako honetan datzan araudia aldatzea: zenbait lokaletan alkohol-salmentaren ordutegia mugatzea "leku publikoetan ez kontsumitzeko, horrek gizalegezko jokabideak aldatzea dakarrelarik", bai eta "instituzionalizatutako substantziak izenekoekin dagoen tolerantziatik sor daitezkeen osasun publikoko arrisku potentzialak" murrizteko ere.

Zehazki, 4. artikuluaren paragrafo berriak xedatzen du "debekatuta geratzen dela merkataritza-establezimenduetan edozein alkoholdun edari saldu edo ematea, doan edo ez, alkoholdun edariak berehala kontsumitzeko ez diren establezimenduetan, haiek saldu edo emateko baimenduta daudenak, beren ordutegi-erregimena alde batera utzita, 22:00etatik hurrengo eguneko 09:00ak arte. Aurreikusitako ordutegi hori ere salmenta ibiltariek, urrutiko salmentak eta etxez etxeko salmentak errespetatu beharko dute".

Muga hori ez betetzeak arau-hauste larri gisa tipifikatuta dago, eta honako zehapen hauetakoren batekin zeha daiteke:

- 6.010 euroko isuna, gehienez ere.

- Jarduera debekatzea edo etetea gehienez ere bi urtez.

- Lokala ixtea gehienez ere urtebetez.

2012ko abenduaren 31n, Foru Komunitatean guztira 1.259 establezimendu erregistratuta zeuden alkohola saltzeko baimenarekin. Haietatik, gehienak (1.208) elikagaien eta edarien txikizkako saltokiei dagokie eta 61 era guztietako ardo eta edarien saltokiei.

Zati handienean, biztanle gehien duten udalerrietan daude. Hala, esate baterako, Iruñeak era horretako 381 establezimendu ditu, Tuterak 66 lokal; Lizarrak, 31; Barañainek, 19; Burlatak, Tafallak, Azkoienek eta Corellak, 18.

Nafarroaren aurretik, beste hamaika autonomia erkidegoek jarri dute debeku-mota bera: Madril, Andaluzia, Gaztela eta Leon, Kanariak, Balear Uharteak, Galizia, Kantabria, Extremadura, Valentziako Komunitatea eta Katalunian.