Nafarroako Gobernuak datorren ikasturtean detekzio-, orientazio- eta laguntza-zerbitzu bat abian jarriko du Lanbide Heziketako (LH) ikasleei eta berriki titulatu direnei beren enpresa propioa sortzen laguntzeko. IdeAccion izeneko programan 30.000 euro jarri dira, eta haren helburua talde horretan ekintzailetza sustatzea da negoziorako ekimen nahiz ideia goiztiarrak detektatuz.

Zerbitzua LHko zentroen eta CEINeko (Nafarroako Enpresen eta Berrikuntzaren Europako Zentroa) proiektu-sehaskaren bidez antolatuko da, Nafarroako Enpresarien Konfederazioarekin elkarlanean.

Bilatzen den helburua egitura-mailan sendoak diren enpresa berriak sortzea da, fase goiztiar batean ekintzaileak nahiz negozio-ideiak detektatuz. Bilaketa LHko ikasle eta titulatu berrien artean egingo da (ikasketak azken hiru urteetan amaitu dituztenen artean bereziki), eta haiek beren enpresa propioen buru izateko prestakuntza jasoko dute. Ideia epe ertainean soldatako enplegua sortzea da.

Ekimena ostiral honetan aurkeztu du lehen lehendakariorde eta Ekonomia, Ogasun, Industria eta Enplegu kontseilari Lourdes Goicoecheak; Hezkuntza kontseilari José Iribasek; eta Nafarroako Enpresarien Konfederazioko lehendakari José Antonio Sarríak.

Programa Nafarroako Gobernuaren Ekintzailetza Planaren barnean sartzen da. Plan horrek ekintzailetza ikuspegi integral batetik bultzatzen du, hezkuntzaren bidez ekintzailetzaren kultura sustatuz; ekintzaileak aholkularitza pertsonalizatuaren bidez lagunduz; laguntzetan eta pizgarri fiskaletan oinarritutako euskarri ekonomikoarekin; eta enpresa-sektoreak parte hartzea duen ekintzaileentzat laguntza-sare bat sortuz.