Gizarte Politiken kontseilari Iñigo Alli-k, berriki Espainiako bi txapelketetan parte hartu duten kirol egokituen Nafarroako selekzioko 17 kideri harrera egin die Nafarroako Jauregiko Tronuaren Aretoan.

Ikusmeneko, adimeneko desgaitasuna duten edo garun-paralisia duten 17 kirolari dira eta atletismoan nahiz igeriketan lehiatu dira. Alli kontseilariak aitortu die "beste guztientzako eredu direla, gazteentzat bereziki" eta azpimarratu du haien, haien familien eta Nafarroako Gobernuaren artean "desgaituko ez duen gizarte bat lortu behar dugula".

Omendutako sei kirolarik, iragan martxoaren 9an eta 10ean, garun-paralisia eta ikusmen-desgaitasuna duten pertsonentzako autonomia erkidegoen arteko Espainiako txapelketan parte hartu zuten, Donostian. Igeriketan aritu ziren, 14 domina eskuratu dituzte, eta Aralar Pérez-ek Espainiako bi errekor lortu zituen.

Gainerako hamaikek ekainaren 5ean jardun zuten adimen-desgaitasuna duten pertsonentzako autonomia erkidegoen Espainiako txapelketan, San Fernandon (Kadiz). Haietako bost igeriketako probetan aritu dira eta, beste seiak, atletismoan. Bi diziplina horietan Nafarroako selekzioa ranking-eko seigarren postuan sailkatu da eta, atletismoan, bigarren postuan.

Ekitaldian ere beraien kirol-teknikariek esku hartu dute, Nafarroako Kirol eta Gazteria Institutuko zuzendari-gerente Pruden Induráin-ek, Gizarte Politika eta Kontsumoko zuzendari nagusi Mariano Oto-k, eta Nafarroako Kirol Egokituen Federazioko lehendakari Blas Arróniz-ek. Omendutako kirolariek intsignia bat jaso dute, eta bertan Nafarroa ezkutua ageri da.