Aurreikusita dago aurten amaituko direla Añeriko Lorategian egiten ari diren lanak, hura errekuperatu eta Bertizko Natur Parkeko bisitariek erabili eta goza ahal dezaten datorren urtetik aurrera. Horretarako, 2013an gaizki osatutako edota gaixo dauden zuhaitzak mozten jarraituko da, bideak mugatzen, lurreko eskailerak konpontzen, eta heskaiak inausten. Lan horiek guztiak 2012ko hasieran egiten hasi ziren.

Hala jakinarazi zaie Parkeko Patronatuko kideei, eta atzo bildu zirenak Landa Garapen, Ingurumen eta Toki Administrazioko kontseilari José Javier Esparza buru zela.

Bileran azpiegitura, erabilera publiko eta kontserbazioko arloetan 2011n eta 2012an egindako jarduketa nagusiak errepasatu ziren, eta 2013rako aurreikusitakoak aurkeztu; urte honetan Nafarroako Gobernuak 363.700 euro inbertitzea aurreikusten du.

Parkeko erabilera publikoari dagokionez, berrikuntza gisa, ingurumen-boluntariotzaren kontzeptua sartu nahi da eta, horretarako, izan daitezkeen jarduketen proposamen bat eta boluntarioen prestakuntza landuko da. Bestalde, Bertizko Natur Parkeak gidatutako ibilbide-zerbitzuen eskaintza handituko du Lorategi Botanikoaren eta Baso Mintegiaren arteko ibilbide berria abian jarriz.

Gainera, aurreko urteetan bezala, ekitaldi honetan jendearentzako arreta ematen segitzen da hainbat ekipamendutan (Dokumentazio Zentroa, Harrera Etxola, CIN, Lorategi Historiko-Artistikoa, Kotxe-tokia…), jendearentzat orokorrean bisita gidatuen zerbitzua eskainiz. Halaber, udazkeneko eta udaberriko eskola-kanpainen bisitei erantzuten jarraituko da, eta haientzat eskura dagoen materiala berritu eta eguneratu da.

Era berean, zaintzen, azpiegituren mantentze-lanen eta garbiketako zerbitzuarekin jarraituko da. Gogoratu behar da 2011n Parkeak 71.250 bisitari hartu zituela, eta 2012an, 70.168. 2013ari dagokionez, urtarrila-ekaina aldian 30.240 bisitari izan zen.