Landa Garapen, Ingurumen eta Toki Administrazioko kontseilari José Javier Esparza gustura azaldu da Ministro Kontseiluak gaur hartutako akordioagatik. Haren bidez, argi berdea ematen zaio Nekazaritza, Elikadura eta Ingurumen Ministerioaren eta Foru Komunitatearen arteko hitzarmena aldatzeko hirugarren akordioaren sinadurari Nafarroako Ubidea egikaritzeko, eta proiektuaren jarraipenerako eta hobekuntzako zer garrantzi duen nabarmendu du.

Esparzaren hitzetan, "gaurko akordioak Nafarroak eta Gobernu zentralak Nafarroako Ubidearekiko duten konpromiso irmoa eta segurua sendotzen du, Foru Komunitatearentzat oinarrizkoa den azpiegitura eta haren lehen onurak jadanik ikusten hasi dira".

Nolanahi ere, kontseilariak gogora ekarri du epe luzerako obra bat dela eta haren eragin positiboa osorik berrogeita hamar bat urteko epean nabaritu ahalko dela. Alde horretatik, 59.160 hektareak ureztatzen jartzeak 8.000 lanpostu egonkor sortzea ekarriko du nekazaritzako eta nekazaritza-industriako arloan. Gainera, 2006 eta 2056 arteko tartean sektorean sortutako balio erantsi gordina 14.634 milioi eurokoa izatea aurreikusten da eta Ubideari lotuta Foru Komunitatean bilduko diren zergak 2.041 milioi eurokoa izatea. Gainera, hidroelektrizitatearen ekoizpenari esker, CO2a asko aurreztuko da eta Nafarroako biztanleriaren % 70ak ur-hornidura jaso ahal izango du.

Nafarroako Ubideak, gainera, gizarte guztiarentzako onura garrantzitsuak dakartza, ondorengo terminoetan: landa-garapena eta biztanleriaren finkatzea, jardueren eta ekoizpenen dibertsifikazioa eta obrak eragin ahal izan dituen inpaktuak konpentsatzeko ingurumeneko hobekuntzak.

Foru Gobernuko Lehendakariaren eta Nekazaritza, Elikadura eta Ingurumen Ministroaren arteko hitzarmenaren izenpetzea datozen asteotan egingo da.