Esparzak azpimarratu du, baita ere, erkidegoetako LGPekin batera programa nazional bat edukitzearen aldeko apustua egin dela, eta asmoa dela programa nazional horren neurri nagusietako bat erkidegoez gaindiko kooperatibak bultzatzea eta sustatzea izatea; hori Nafarroak egindako eskarietako bat zen.

Landa-garapenerako hurrengo programari dagokionez, Europar Batasunak sei lehentasun ezarri ditu: nekazaritzan, basogintzan eta landa-eremuetan jakintzaren transferentzia eta berrikuntza sustatzea; nekazaritza-mota guztien lehiatzeko gaitasuna eta ustiategien bideragarritasuna hobetzea; elikagaiak banatzeko katearen antolaketa eta nekazaritza-sektoreko arriskuen gestioa sustatzea; nekazaritzaren eta basogintzaren mende dauden ekosistemak lehengoratzea, zaintzea eta hobetzea; nekazaritzan, elikagaien sektorean eta basogintzan baliabideen eraginkortasuna sustatzea eta klimaren aldaketei egokitzeko gai den ekonomia hipokarbonikora pasatzeko pausoak ematera adoretzea; eta gizarteratzea, pobreziaren gutxitzea eta landa-eremuetako ekonomiaren garapena sustatzea.

Gehigarri gisa, Europako Batzordeak Espainiako kasurako baldintza bat jarri du: programak estatuko erronka premiazkoenei zuzenean aurre egiteko antolatzea. Premiazko erronka horiek gai hauekin dute zerikusia: gazteen langabezia, lan-produktibitate eskasa, pobreziaren areagotzea, gizarte-bazterkeria, ETEen lehiatzeko gaitasun eta nazioartekotze-maila eskasa, ikerketa- eta berrikuntza-sistema ahula, sistema horretan sektore pribatuak gutxi parte hartzea eta natura-baliabideak eraginkortasunez ez erabiltzea.

Horregatik, Espainiako lehentasun orokorrak eta ahultasun espezifikoak kontuan hartuta eta 2014-2020 aldirako Landa Garapenerako Programa egite aldera, Esparza kontseilariak Segimendu Batzordeko kideei azaldu die Foru Gobernuaren iritziz ezinbestekoa dela neurri hauek garatzea:

- Lehiatzeko gaitasuna eta enplegua hobetzeko inbertsioak: nekazaritza-ustiategiak modernizatzea; nekazari, abeltzain eta basogintza-enpresaburu gazteak jartzea; eta nekazaritza-elikagaien industrian inbertsioak egitea.

- Uraren eta lurraren erabilera eraginkorragoa izateko inbertsioak: eraginkortasun handiko ureztaketa-sistemak, teknologia garbiak eta abar ezartzea.

- Sektoreko teknologia berritzea, ikerketetako emaitzen transferentzia ahal bezainbeste optimizatuz. Funtsezkoa da estatuan puntakoak diren erakundeak Nafarroan inplikatzea: INTIA, CNTA, UPNA, CONSEBRO, Nafarroako Unibertsitatea, e.a. Erakunde horiek, betiere, elkarrekin edo estatuko eta Europako beste erakunde batzuekin lankidetzan aritzeko gai izan behar dute.

- Mendialdean dauden edo muga naturalak dauzkaten ustiategiak bideragarri izan daitezen laguntzea; gehienak abeltzaintza estentsibokoak dira eta Nafarroako leku askotako landa-biztanleei eusten diete.

- Landa-eremuen dibertsifikazioa eta landa-biztanleei eusten laguntzen duten oinarrizko azpiegiturak sustatzea, natura-baliabideak modu eramangarriagoan gestionatzeko berme gisa, eta tokiko garapen partizipatiboari garrantzi handia ematea.

Hurrengo pausoak

Orain, Landa Dibertsifikazio eta Garapen Zerbitzua barne-lana egiten ari da, besteak beste FEDER eta FSE funtsen gestioa Nazioarteko Hedakuntza Zerbitzuarekin koordinatzea eta MODERNA Plataforma prestatzea, programa egiteko prozesuan biztanleek ere parte har dezaten. Halaber, Nafarroaren abiapuntua aztertzeko lana oso aurreratua dago. Eta, gainera, LGP berria egiteko prozesua kanpo-ebaluatzaile batek ebaluatzeko prozesua hasita dago, Europar Batasunak eskatzen duen moduan.

LGP berria behin betiko onartu arterainoko jardueren egutegiari dagokionez, irailean esango dute estatu kide bakoitzari zer aurrekontu dagokion, eta iraila eta urria bitartean esleituko dizkiete autonomia erkidegoei Espainiak landa-garapenerako jasotako funtsak. Gero, urrian eta abenduan Landa Garapeneko Arautegia onartuko da.

Azkenik, 2014ko martxoan Europako Batzordeari Nafarroako 2014-2020 aldirako Landa Garapenerako Programaren lehen zirriborroa bidaliko zaio, eta maiatzean behin betikoa. Erkidegoetako LGPak seguru asko azaroan onartuko dituzte behin betiko. Hasiera batean, Nafarroako 2014-2020 aldirako LGP berriak, behin betiko onartu ondoren, atzeraeraginezko ondorioak izango ditu, eta urte hasieratik aplikatzen hasiko da.

Bileran honako hauek hartu dute parte: UAGNko Felix Barian eta Jose Andres Palacios; UCANeko Jose M. Martinez eta Patxi Vera; EHNEko Pablo Iribarren; CENeko Javier Martinena; FNMCko Fermin Cabases; Cederna-Garalur erakundeko Jose M. Ayerdi eta Isabel Elizalda; Teder elkarteko Cristina Roa; Erdialeko Tokiko Ekintza Taldeko Cristina Arconada eta Cristina Bayona; EDER kontsortzioko Yolanda Marco eta Enrique Castel-Ruiz; Consebro erakundeko Jose Manuerl Moreno; eta FORESNA-ZURGAIAko Juan Miguel Villarroel.