Construcciones Vaquebel S.L. enpresa arduratu da obrak burutzeaz. Iñigo Esparza arkitektoa izan da lanen zuzendaria eta Vianako Printzea Erakundeak gainbegiratu ditu.

Lehenago ere, dorrea (2002: 60.000 euro, horietatik 30.000 euro Foru Gobernuak eman zituen),  teilatua eta egitura (2003 eta 2004: 429.591,89 euro, horietatik 214.188,22 euro Foru Gobernuak eman zituen), eta terraza eta harresiak konpondu zituzten (2006 eta 2007: 131.863,41 euro, horietatik, Nafarroako Gobernuak 86.765,88 euro eman zituen), baita gazteluko margolanen bilduma leheneratu ere (2011-2013: 40.268,52 euro).

Gainera, Cortesko gazteluaren Lagunen Elkarteak gotorlekua zaharberritzeko lanetan laguntzen du borondatez: egongelak pintatu, arrailak, leihoak eta zoruak konpondu, altzariak, errezelak eta beirateak leheneratu eta abar. Elkartea 2008an eratu zen eta, gaur egun, 250 boluntario baino gehiagok osatzen dute.

Bisita gidatuak

Zaharberritzeko proiektuak badu xederik, hortaz, ez da egin gelak konpontzeko bakarrik, bisita gidatuak ere sustatu, kudeatu eta antolatu dira.

Cortesko gazteluaren Lagunen Elkartea arduratuko da horietaz, hilabete bakoitzeko azken igandean, 12:00etan. Erabilgarritasunaren arabera, beste edozein egunetan ere eskainiko dituzte bisita gidatuak. Bisitak telefonoz adostu beharko dira (676 381 563).

Ordu bete eta erdikoak dira gutxi gorabehera, eta gazteluaren gunerik adierazgarrienak ikusteko aukera eskainiko dute. Armen patioan hasi eta dorrea eta beheko solairuko gelak ikusi ahal izango dira, hau da, zerbitzuetarako erabiltzekoak direnak (gurdien gela, ziega, sotoak etab.).

Ondoren, solairu nagusian, galeria handia, Oibarko gatazkaren tapiza duen egongela, jangela nagusia, estilo isabelinoko egongela, erretratuen egongela, eta kondearen gelaurrea eta gela ikusteko aukera izango dute bisitariek. Horiek guztiak jatorrizko altzariekin eta margolanen bilduma zaharrarekin daude apainduta.

Gaztelua

Cortesko gaztelua XI. mendearen amaierako eta XII. mendearen hasierako eraikin historikoa da, 1993. urtean Nafarroako kultura-ondasun gisa aitortu zena.

Lehengo Nafarroako Erresuma Erdi Aroko gotorleku nagusietako bat izan zen, Aragoirekiko mugan dagoelako. Bertan bizi izan ziren denboraldi batez Nafarroako errege batzuk. XV. mendean, jabetza hainbat leinu argik eskuratu zuten eta, egindako berrikuntza guztiekin, itxura militarra aldatuz joan zen jauregi bihurtu arte. 1999ko urriaren 21ean Cortesko udalak erosi zuen.

Gazteluak 4.538 metro koadroko azalera eraikia du, eta lehengo banaketa mantentzen du: armen patioa inguratzen duen harresiztatutako perimetro handia, jauretxea mendebaldeko hegalean eta dorre prismatikoa almenekin hego-ekialdean.

Barrualdean jatorrizko altzariak eta hainbat garai, estilo eta eskolatako Bateratzearen garaiko kondeen margolanen bilduma daude oraindik. Atzealdean gazteluko lehengo baratza dago, 25.000 metro koadrokoa, gaur egun udal-parkea dena.