Zehazki, deialdi berri honi esker, ia 300 plaza izango dituen beste 16 ikastaro egitea espero da. Haiek guztiek 250 ordu iraungo dute eta era presentzialean egingo dira. Profesionaltasun-ziurtagiri bat lortu ahal izango da haiekin, helburu nagusia ikasleak prestatzea, gaitzea baita, alde batetik, lanbide bat era kualifikatuan egiteko, eta bestetik, enplegurako sarbidea errazteko. Horretarako, lan-munduratzeko prestakuntzako ibilbide pertsonalizatuak egitea sustatuko da, eta haien barnean sartuko dira orientazio-ekintzak eta lanekoak ez diren praktika profesionalak.

Une hauetan zabalik dauden deialdiaren bidez, Nafarroako Enplegu Zerbitzuak egiaztatutako prestakuntza-zentroen hautaketa bilatzen ari da profesionaltasun-ziurtagiriak lortzeko. Zentro bakoitzak proposatu behar du inguruko lan-merkatura ondoen egokitu daitekeen zer ikastaro den egokiena; izan ere, baldintzetako bat enplegu bat izateko erraztasuna ematea da. Arrazoi hori dela eta, interesa duen zentro bakoitzak proiektu bat prestatu behar du eta bertan lan-merkatuan duen eskaeraren prestakuntzako eta justifikazioko alderdiak jaso beharko dira.

Ikastaro horiek langabeentzat dira bereziki. 755.061 euro dira guztira, eta haietatik 700.000 prestakuntza-ekintzetarako izango dira; 51.561 beka eta laguntzetarako; eta gainerako 3.500 euroak beharrezkoak izan daitezkeen egokitzapenak finantzatzeko ezintasunen bat duten ikasleak hartze aldera.

Deialdi berri hori Nafarroako Enplegu Zerbitzuak ekainean egin zuen deialdiari gehitu behar zaio; hari esker, 105 ikastaro eskaini ahal izan dira ia 5.000 plazarekin eta, horretarako, izena emateko 5.974 eskaera jaso dira. Guztira, 2013an Nafarroako Gobernuak, Nafarroako Enplegu Zerbitzuaren bidez, 3,35 milioi euro erabili du langabeentzako prestakuntza-eskaintza guzti horretarako.