Nafarroako Lehendakari Yolanda Barcinak egungo Espainiaren esparru autonomikoa defendatu du, "tentsio separatisten" aurrean, eta ongizatearen Estatuari eusteko garaian autonomia erkidegoek duten zeregina aitortzeko eskatu du, "eredu horren zati handiena bezala, osasunean eta hezkuntzan oinarritutakoa", "xahutzaile" jotzen duten haien aurrean.

Yolanda Barcinak adierazpen horiek Club Navarra Puerta de Europa informazio-gosarian egindako agerraldian egin ditu astearte honetan, Iruñean.

Bere mintzaldian, Konstituzioa erreformatzeko asmoa duten "ondo aztertu gabeko" proposamenak aipatu ditu, haien artean Nafarroak Estatuarekin duen hitzarmen ekonomikoaren aurkako "burutazioak". Haien aurrean, Lehendakariak adierazi du "ezinbestekoa" dela foru-erregimenarekiko "erabateko errespetua" bermatzea, "Konstituzioak babestutako sistema, eta Espainiako Kongresuan alderdiren batek planteatu duenaren aurka, ez da insolidarioa edo bidegabea".

Alde horretatik, gogorarazi du "Nafarroak defizit-helburuak betetzen dituela eta sakrifizioarekin eta elkartasunarekin Espainia guztiaren ahaleginak partekatzen dituela", eta, gai horri dagokionez, esan du "ezin direla inolaz ere onartu kudeaketa txarra egiten eta desleialtasun instituzionala gauzatzen duten batzuen aldeko tratuak".

Nafarroa, beste eskualde batzuk baino hobeto

Ekonomia arloan, Lehendakariak azaldu du azken asteotan "errekuperazio ekonomikoaren bidearen hasiera iradokitzen duten zantzuak ugaritu egin direla", nahiz eta "tentazio triunfalistei" uko egiten dien eta "errealismoa" eskatu duen. "Horrek ez du esan nahi erritmo altuan haziko garela, enplegu asko sortuz", aipatu du. "Horretarako, zoritxarrez, zain egon beharko dugu, baina hondoa jo dugu eta itsas azalerara hurbiltzen ari gara".

Beste adierazle batzuen artean, langabezia jaistea eta urteko hazkunde-tasa positiboetarako joera aipatu ditu, "2014an % 0,6 inguruan mugi daitezkeenak".

Ildo horretan, Yolanda Barcinak azpimarratu du Nafarroak azken urte eta erdian izan duen "okertze erlatiboa" "salbuespenezkoa eta iragankorra" izan dela. Hala, aipatu du Espainiako hiruhileko BPG 2007ko amaierakoa baino % 7 txikiagoa bada, Nafarroakoak % 1,8 egin du atzera atzeraldi bikoitz honetan zehar. Eta Nafarroaren "egiturazko indarguneez" aritu da, eta haien artean industriak ekonomian duen garrantzia nabarmendu du (BPGaren % 28), Alemaniaren antzekoa dena.