Datorren urriaren 8an izango da Europako Guratrans (Pirinioetako mendebaldeko muturreko mugaz bestaldeko erreken tokiko parte hartzeko kudeaketa intergrala) proiektuari buruzko informazioa lortzeko eta bertan parte hartzeko prozesua hasiko duen jardunaldia.  Proiektuan parte hartuko du Nafarroako Gobernuak Nafarroako Ingurumen arloko Baliabide Zentroarekin (CRANA) batera, eta Foru Komunitatean Araxes, Bidasoa, Leitzaran, Urdazuri eta Urumea ibaietan gauzatuko dituzte jarduerak, mugaz gaindiko kudeaketari dagokionez . Horretarako, 304.076 euroko aurrekontua izango du proiektuak; zenbateko horretatik 197.649 euro Europako funtsetakoa da eta gainerakoa, 106.427 euro, Nafarroako Gobernuak eman du.

Bilera 17:30ean hasiko da, eta interesa duen edozein erakunde edo pertsonarentzat irekita egongo da, Bertizko Jauregian, Oieregin. Andrés Eciolaza Ingurumenaren eta Uraren zuzendari nagusiak eta Ana Varela CRANAko teknikariak bertan parte hatuko dute. Parte hartzeko, aurrez izena eman beharko da cranaguratrans@gmail.com helbidera idatzita edo 948 390 045 telefono-zenbakira deituta. Jardunaldiko programa www.guratrans.eu webgunean ikusi ahal izango da.

Jardunaldiaren bidez Guratrans proiektua inguruko eragile sozialei aurkeztea da asmoa, horien bidez hasi ahal izango baita informazio lortzeko eta parte hartzeko prozesua ekarpenak jasota.

Mugaz gaindiko lankidetza eta partaidetza publikoa funtsezkoak ibaiak hobetzeko

Europar Batasunak ezarritako Urari buruzko Direktibak ura babesteko Europar Batasuneko esparrua ezartzen du, arro hidrografiko bakoitzera egokitutako kudeaketa-planen eta neurri-programen bidez. Ur-korronteek administrazioen mugarik ez dutenez, euren ibilguenak baizik, direktiba horrek, urak batera kudeatzeko, herrialdeen eta ibaiekin zerikusirik duten alderdien arteko lankidetza ezartzeko beharra ere jasotzen du. Bestalde, direktibak eskariaren kudeaketa eta uren egoera ekologiko ona hobetzeko beharra azpimarratzen du. Horretarako, parte-hartze publikoa sustatu behar dela nabarmentzen du lurraldeetan jarduera-ildoak eta estrategiak ezartzeko bitarteko gisa.