Konplikazioak izateko arrisku handia daukatenak dira lehenik, 60 urtetik gorakoak; bigarrenik, gaixotasun kardiobaskularrak edo biriketakoak izan dituzten eta azkeneko urtean gaixotasun metaboliko kronikoengatik (diabetes mellitus barne), giltzurruneko gutxiegitasunagatik, obesitate morbidoagatik, hemoglobinopatiengatik edo immunosupresioagatik (botikek eragindakoa barne) aldizkako segimendu medikoa egitea edo ospitaleratzea behar izan dutenak; hirugarrenik, inplante koklearra dutenak; eta azkenik, egoitzetan bizi direnak, adina dena delakoa ere. Multzo horretan sartzen dituzte, baita ere, sei urtetik gorako haurrak, asma duten haurrak eta aspirina-tratamendu luzeak dauzkaten haur eta adoleszenteak (sei hilabetetik 18 urterakoak).

Orobat, beste batzuei gripea kutsatu diezaieketen multzoan daude medikuak, erizainak eta gripea hartzeko arrisku handia dutenei (adinduei, transplanteak dituztenei, ihesa dutenei…) arreta ematen dieten ospitaleko eta ospitalez kanpoko langileak; egoitzetako eta gaixo kronikoak zaintzeko zentroetako langileak, baldin eta egoiliarrekin harreman zuzena badute; arrisku handiko gaixoak zaintzera haien etxera joaten direnak; eta arrisku handiko pertsonekin biz idirenak, haurrak barne.

Zerbitzu publiko bezerietan lan egiten dutenen multzoan daude segurtasun-indarreko langileak, su-hiltzaileak, babes zibileko zerbitzuetako langileak eta irakasleak. Horrez gain, hegazti-granjetan eta agerraldiak kontrolatzen eta deuseztatzen (hildako animaliak deuseztatzen, kutsatutako eremuak garbitzen eta desinfektatzen) lan egiten dutenei ere txertatzea komeni zaie.

Txertoak jarriko dira osasun-zentroetan eta kanpainan sartzen den jendea hartzen duten lekuetan, hau da, osasun-zentroetan (ospitale publiko eta pribatuetan), adinduentzako egoitzetan, segurtasun-indarren, su-hiltzaileen eta babes zibileko zerbitzuen instalazioetan, eta enpresetan.

Gripearen kontrako txertoaz gain neumokokoen kontrakoa ere jarriko diete 65 urtetik gorakoei eta aurrez jaso ez duten arriskudun gaixoei.

Nafarroako Gobernuaren web-orrian, atal bat dago herritarrei gripeari buruzko informazioa emateko (maiz egiten diren galderak, gaixotuz gero zer egin behar den, prebentzio-neurriak, e.a.), baita kanpainaren berri emateko liburuxka bat ere. Gripearen kontrako txertoari buruzko informazio gehiago nahi baduzu, zure kontsultategi edo osasun-zentroko langileengana jo besterik ez duzu.

Txertaketei esker, aurreko aldian berrogeita hamar pertsona gutxiago ospitaleratu ziren

Nafarroan gripearen kontrako txertoak jartzeko kanpainak egiten dira udazkenero, 1990. urtetik. Zehazki, aurreko kanpaina iazko urrian eta azaroan egin zen eta 113.367 dosi jarri zituzten; estaldura %17,59koa izan zen. Lehen mailako arretako sare publikoan erregistratutako dosien arabera, 65 urtetik gorakoen multzoan estaldura %57koa izan zen, eta 60 urtetik 64 urtera artekoen multzoen %25ekoa.

Kalkuluen arabera, lehen mailako arretan arrisku-faktoredun pertsonen 700 kontsulta saihestu ziren, baita 44 pertsona ospitaleratzea eta zainketa intentsibora 6 pertsona bidaltzea ere. Ustez, 65 urtetik gorakoei ematen zaien 290 txerto-dosiko pertsona bat hiltzea saihesten da.

Aurreko denboraldian 13.120 pertsona gaixotu ziren (1.000 biztanleko 21), aurreko bi aldietan bezala, eta gaixotasunaren intentsitatea, beraz, ertaina izan zen. 2009-2010 aldian gaixotu ziren asko, 1.000 biztanleko 32, hain justu.

Epidemia-ataldea urtarrila eta martxoa bitartean gainditu zen, eta otsailean gaixotu zen jende gehien: 100.000 biztanleko 247 lagun. 5 urtetik 14 urtera artekoak gaixotu ziren gehien. Gainerako adin-multzoetan intzidentzia aurreko aldikoaren antzekoa edo txikiagoa izan zen.

Gripea

Urtaroko gripea gaixotasun infekzioso birikoa da eta airez kutsatzen da. Bat-batean hasten da; inkubazio-aldia gehienez hiru egunekoa izaten da eta transmisio-aldia 3-5 egunekoa helduen kasuan eta 3-7 egunekoa haurren kasuan, betiere gaixotasuna hasitako egunetik kontatzen hasita. Sintomak dira, besteak beste: sukar handia, egonezina, buruko eta giarreetako mina, sudurreko kongestioa, eztarriko mina eta eztula.

Gaixotasuna prebenitzeko neurri egokienak dira, Osasunaren Mundu Erakundeak gomendatutako anduiekin urtero txertatzeaz gain, eztul edo doministiku egiterakoan sudurra eta ahoa tapatzea eta eskuak xaboi-urez minutu batean garbitzea, garbiketa eraginkorra izan dadin.