Castellano | Euskara | Français | English

Bilatzaile erabili!

Ikusi egun honetako albiste gehiago

Azaroaren 4tik 9ra Iruñean izango da “Ingurumenari eta Klima-aldaketari buruzko Astea” asteartea, 2013.eko urriak 22

Aldi berean izango dira klima-aldaketak mendialdeetan dituen ondorioei buruzko Europako herrialdeen arteko solasaldi bat, fenomenoaren inguruan informatzeko moduari buruzko biltzar bat eta natura kontserbatzeari buruzko ikus-entzunezko jaialdi bat.

Azaroaren 4tik 9ra, Iruñean izango da ‟Ingurumenari eta Klima-aldaketari buruzko Astea". Hainbat jarduera antolatu dira, esate baterako, klima-aldaketak mendialdeetan dituen ondorioei buruzko Europako herrialdeen arteko solasaldi bat, fenomenoaren inguruan informatzeko moduari buruzko biltzar bat eta natura kontserbatzeari buruzko ikus-entzunezko jaialdi bat.

Ekimen horien bidez klima-aldaketara egokitzea, jardun onak trukatzea eta herritarrei gaiari buruzko informazio zorrotz eta eraginkorra ematea bezalako alderdien ezagutzan aurrera egitea da asmoa.  Era berean, ikertzaile, eragile sozial eta ekonomiko, administrazio eta hedabideen artean lankidetza eta ezagutzen trukaketa sustatzea ere bada ekimenaren helburua.

Mendialdeetako klima-aldaketari buruzko nazioarteko solasaldia

Zehazki, Europako herrialdeen arteko solasaldia azaroaren 6an izango da Iruñeko Planetarioan. Euskaraz, ‟Behatu egokitzeko" izango da solasaldiaren izenburua. Pirinioetako Lan Elkarteak (PLE) antolatu du hitzaldia Klima Aldaketaren Pirinioetako Behatokiaren (KAPB) bidez, mugaz gaindiko erakundeak PLEren lehendakaritza hurrengo lurraldeari pasatzeko Nafarroako hiriburuan egingo den osoko bilkuraren barruan. Kargua Nafarroako Gobernuak izan du bi urtez Foru Komunitatea ordezkatuz, eta Andorrak hartuko du hurrengo bi urteetarako.

Jardunaldian Frantziako, Andorrako, Espainiako eta Europako beste herrialde batzuetako ikertzaile, teknikari eta agintariak elkartuko dira, klima-aldaketak mendialdeetan dituen ondorioei buruz eztabaidatzeko.

Programa gaikako bi bloketan dago banatuta: goizeko hitzaldiak Europako mendialdeetan klima-aldaketara egokitzeko egiten ari diren ekintzei buruzkoak izango dira, herrialde guztiek dituzten arazoak azaleratu eta alor batetik bestera lekualda daitezkeen ekimenak azpimarratzeko.  Testuinguru horretan, Pirinioak, Karpatoak eta Alpeak bezalako mendiguneen kasuak aztertuko dira.

Arratsaldean, Klima Aldaketaren Pirinioetako Behatokia prestatzen ari den lana aurkeztuko dute. Erakunde hori da Europan eratu zen mugaz gaindiko lehena. Helburu nagusiak diagnostikoak burutzeko bitarteko eta metodoak homogeneizatu eta bateratzea dira, hau da, klima-aldaketaren eraginen jarraipena egiteko adierazle komunak sortzea eta gomendio bateratuak ezartzea, lurralde guztiek estrategia koherenteak aplika ditzaten. Besteak beste, behatokiak klima, ura, basoak eta naturaren eta bioaniztasunaren arriskuak bezalako elementuetan klima-aldaketak dituen ondorioak aztertzen ditu. Solasaldia amaitzeko, hedabideetan fenomenoa tratatzeko moduari buruz hitz egingo dute.

Doan joan daiteke solasaldira, baina linean lortu behar da akreditazioa, helbide honetan: http://www.opcc-ctp.org/opcc_event/index_es.html

Nafarroako Unibertsitatea: Komunikazioaren Nazioarteko Biltzarra eta Telenatura jaialdia

Bestalde, aste berean, Nafarroako Unibertsitateko Komunikazio Fakultateko bi ekimen izango dira: 

- XXVIII. Komunikazioaren Nazioarteko Biltzarra azaroaren 7 eta 8an izango da, eta, oro har, ingurumenaren inguruko eta, bereziki, klima-aldaketari buruzko kazetaritzaren eta komunikazioaren arteko elkarreraginean zerikusia duten alderdiak eztabaidatuko dira.

- Telenatura, Natura iraunarazi eta haren berri zabaltzeko XII. Jaialdia, astelehenetik ostiralera izango da (azaroaren 4tik 8ra), Iruñeko Planetarioan.

Prentsa oharra:

Albiste hau osorik izan nahi baduzu PDF artxibo batean sakatu hemen

Jar zaitez gurekin harremanetan | Erabilerraztasuna | Lege abisua | Webaren mapa