Aldaketa horiekin, Ingurumen eta Uraren Zuzendaritza Nagusia lau zerbitzutan egituratuko da: Ingurumen Kalitatearen Zerbitzua, Biodibertsitatea Kontserbatzeko Zerbitzua, Uraren Zerbitzua eta Mendien Zerbitzua.

Mendien Zerbitzu berriaren sorrerarekin batera, proposatutako aldaketak bi atal kentzea dakar: Hiriko Ingurumen Atala eta Plangintza eta Laguntzen Atala. Hala, urtean 32.869 euro aurreztuko dira.

Mendien Zerbitzuak mendien babes eta hobekuntzari lotutako eskumenak egikarituko ditu, bereziki basoko aprobetxamenduen iraunkortasunarekin, basoko plangintzarekin eta egurraren nahiz basoko biomasaren erabileraren mugikortasun eta sustapenarekin. Bi ataletan egituratuko da: Basoak Kudeatzeko Atala eta Basoak Zaintzeko Atala.

Basoak Kudeatzeko Atalaren eskumenen artean azpimarratu behar dira: antolatutako mendien aprobetxamendu eta hobekuntzaren urteko planak landu, onartu eta egikaritzen jarraitzea, bai eta antolatu gabeko mendietan mozteko baimenena ere, herrikoak nahiz partikularrenak; mendiak antolatzeko proiektuen lanketa eta jarraipena, haien berrazterketena eta basoak kudeatzeko plan teknikoena; babes-mendien katalogoei eustea eta erabilera publikokoak direnak; eta baimenei buruzko informazioa eta, hala badagokio, okupazioena, desafekzioena eta eragiten dieten beste egintza guztiena.

Basoak Kudeatzeko Atalaren beste eskumen batzuk honako hauek dira: basoko lurzoruari eragiten dien jarduera, plan eta proiektu ororen berri zehatza ematea;ekintza zehatzak planifikatu eta egikaritzea basoko suteak prebenitzeko; Nafarroako Larrialdi Agentziara (NLA) teknikoki jotzea eskatzen zaizkien sua itzaltzeko zereginetan; basoko produktuen erabilera iraunkorra sustatzea; eta basoko sektoreari bultzada ematea. Gainera, Nafarroako Basoko Ondarearen finkak kudeatzea dagokio, Urbasa-Andiako Natur Parkea osatzen dutenak barne; basoko gaitz eta izurriteen jarraipena eta kontrola egitea; eta neurri zehatzak egikaritzea berrezartze hidrologikorako eta baso-berrezarpenerako eta mendien mantentze-lanetarako, hobekuntzarako nahiz erabilera iraunkorrerako. Halaber, Basoko Aholku Kontseiluaren idazkaritza-lanak dagozkio.

Basoak Zaintzeko Atalari dagokionez, azaroaren 3ko 132/2005 Foru Dekretuan jasotako zaintza, ikuskaritza eta kudeaketako eskumenak egikarituko ditu; dekretu horren bidez, basoak zaintzeko langileen berariazko erregimena arautzen da. Lan horiek oinarritzen dira: fauna eta flora basatien zaintzan, ikuskaritzan eta kudeaketan, ibai-ingurunearen zaintzan, baso-ingurunearen zaintza eta aprobetxamenduan, babestutako espazioen, abelbideen zaintza eta kudeaketan, eta zinegetika nahiz arrain-hazkuntzaren jardueren kontrolean.