Tuterako Ospitaleko eta Lizarrako García Orcoyen Ospitaleko ekitaldiak

Tuteran, abenduaren 20tik urtarrilaren 7ra arte, osasunaren alorreko langileen seme-alabek egindako Eguberrietako marrazkien erakusketa egongo da ikusgai, ospitalearen sarreran. Horien artetik bat hautatuko da urtarrilaren 5ean, zozketa bidez, eta datorren urteko Gabonetako postalak egiteko erabiliko da.

Abenduaren 24an, 10:00etan, Tuterako Perfusión taldekoek pazienteei zein zentroko langileei Eguberri zoriontsuak opatuko dizkiete. 30ean, 10:30ean, Lourden Kirol Elkartekoek ospitaleko haurrei egingo diete bisita eta opariak banatuko dizkiete. Urtarrilaren 3an, 12:00etan, Ríos Renovables Kirol Elkarteko kideek bisitatuko dituzte haurrak eta opariak ere emango dizkiete.

Urtarrilaren 5ean, 11:00etan, Errege Magoek ospitalean dauden pazienteei egingo diete bisita eta opari bana emango diete, Tuterako osasunaren alorreko langileen abesbatzak lagunduta.

Lizarrako García Orcoyen Ospitalean, 24an, 13:30ean, "Adeste Fideles" gabon-kanta abestuko dute egin ohi duten bezala, eta urtarrilaren 5ean Errege Magoak iritsiko dira. Pediatria ataleko sarreran egingo zaie harrera eta, hala, ospitalean dauden pazienteak bisitatuko dituzte gelaz gela.

Gabonetako menu bereziak

Eguberrietan, Osasunbideako zentroek menu bereziak eskainiko dizkiete ospitaleetako pazienteei egun seinalatuetan.

NOGen, Gabon-gauean, otarrainxka- eta granada-entsalada, legatz langostatua eta barazki-röstia, konpota eta Gabonetako askotariko gozokiak egongo dira afaltzeko. 25ean, bazkaltzeko, kardua almendrekin, arkume errea entsaladarekin, anana naturala eta gabonetako askotariko gozokiak egongo dira. Gabon zahar gauean, zigala-krema ganba salteatuekin, legatz langostatua, San Marcos tarta, Gabonetako askotariko gozokiak eta mahatsa izango dituzte afaltzeko.

Urteberri-egunean, bazkaltzeko menuan, orburu salteatuak urdaiazpikoarekin, arkume errea patata xerratuekin, meloi-bolatxoak bere zukuan eta Gabonetako askotariko gozokiak egongo dira. Erregeen gauean, oilanda-krema, bi arraineko pastela ganba-bisque eta albakarekin, eta gazta-tarta ahalbiekin izango dituzte. Amaitzeko, urtarrilaren 6an, arraindun arroz saldatsua, txerri-azpizuna oporto erara gari-zainzuri eta hirugiharrarekin, eta errege-opil tradizionala emango dituzte.

Tuterako Ospitalean, Gabon-gaueko menuan kontsomeak jerez erara, kardua almendra-saltsan, legatza baratxuri freskoen saltsan, Gabonetako konpota eta turroiak egongo dira; Gabon-egunean, itsaski-krema, kukulu-entsalada zainzurien ozpin-oliotan, masailak kuia-saltsan, izozki-kopa eta askotariko turroiak eskainiko dira.  Gabon zahar gauean, kontsomea urdaiazpiko eta arrautzarekin, orburuak saltsa berdean, bakailaoa pikilloen saltsa, mahatsak eta turroiak izango dituzte.

Urteberri-eguneko bazkarian, zigala-krema brandyrekin, Urteberri-eguneko zizka-mizkak, oilasko gazteak okaran-saltsan, frutadun jogurt-zopa eta turroiak jango dituzte.  Azkenik, errege-eguneko menua hegazti-krema, errege-eguneko zizka-mizkak, zapoa ganba-saltsan, errege-opila eta askotariko turroiak izango dira.

Lizarrako García Orcoyen Ospitalean, Gabon-gauean, itsaski-krema, kardua saltsan, bakailaoa labean erreta patata xerratuekin, anana naturala eta turroiak eskainiko dira. Gabon-egunean, kontsomea, itsaski-entsalada, azpizuna plantxak pikillo piperrekin, limoi-sorbetea eta turroiak izango dituzte bazkaltzeko. Gabon zahar gauean, arrain-zopa, zizka-mizkak (urdaiazpikoa, gazta eta zainzuri-moussea), legatza saltsa berdean eta txirlak, urte amaierako mahatsak eta turroiak afalduko dituzt.

Urteberri-eguneko bazkarian, kontsomea, otarrainxkak plantxan, arkume errea patata xerratuekin, Carolina tarta eta askotariko turrroiak jango dituzte. Errege-gauean, entsalada ahuntz-gaztarekin, izokina saltsa tartariarrarekin, errege-opila eta turroiak jango dituzte. Hurrengo egunean, urtarrilaren 6an, bakailaoa eta ganbak hostorean, entrekota piper berdeekin, mamia eta turroiak.