Balorazio-irizpideak

Proiektu bakoitzean produkzio bakarra aurkeztu ahal izango da, hau da, obrearen sorrera eta estreinaldia.

Programazioak erakunde batek egin edo sustatzen dituenean aurkeztu ahal izango dira, ez beste batzuen programazioaren parte direnean.

Iazko deialdian bezalaxe, eskaerak balorazio-talde batek baloratuko ditu. Talde hori lau batzordek osatuko dute: administrazio-batzordea, administrazio-baldintzak eta betekizunak betetzen direla ziurtatuko duena; batzorde artistikoa, erakundearen ibilbidea eta proiektuaren kalitate artistikoa eta interesa baloratuko dituena; batzorde ekonomikoa, proiektiaren ikusgaitasun ekonomikoa puntuatuko duena; eta gizarte-batzordea, proiektuaren hartzaileei loturiko kudeaketa-estrategiak baloratuko dituena.

Lehen fasean, administrazio-batzordeak deialdian parte hartzeko betekizunen dokumentazioa aztertuko du. Behar besteko agiriak aurkezten ez direnean, interesdunari eskatuko zaio hutsak betetzeko.

Bigarren fasean, gainerako hiru batzordeetako kideek onartutako proiektuak jaso eta banan-banan eta aparte baloratuko dituzte.

Hirugarren fasean, hiru batzorde ebaluatzaileak bereizita elkartuko dira bakoitzaren puntuazioak bateratu eta proiektu bakoitzak batzorde bakoitzean lortu duen osoko puntuazioa zehazteko.

Amaitzeko, administrazio-batzordea hiru proposamenen puntuak batuta azken puntuazioa zein den jakiteko elkartuko da.

Honela banatuko dira puntuak:

-Erakundearen ibilbidea, egitura eta gaitasuna (15 puntu): erakundeak eratu zenetik egin dituen urteak, langileak, azken 3 urteetako produkzio/emankizun aipagarrien kopurua, Gizarte Segurantzako batez besteko kotizazioak edo erakundea estatuko programetan parte hartzeko hautatu izana baloratuko dira.

-Kalitate artistikoa eta proiektuaren interesa (40 puntu): talde artistiko eta teknikoa, aurkeztutako proiektua, Nafarroako ondarearen hedapena eta proiektuaren kalitate orokorra baloratuko dira.

-Kudeaketa-estrategiak proiektuaren hartzaileei dagokienez (20 puntu): marketin-ekintzak, komunikazioa, merkaturatzea eta salmenta; proiektuarekin batera burutzen diren ekintza pedagogikoak eta zailtasun fisiko edo psikosozialak dituzten jendearen irisgarritasuna bultzatzeko ekintzak puntuatuko dira.

-Proiektuaren bideragarritasun eta koherentzia ekonomikoa (25 puntu): eskatutako diru-laguntzaren ehunekoa, finantzazio bermatuarena, eta gastuen eta diru-sarreren koherentzia baloratuko dira.

Erakundeek memoria aurkeztu beharko dute, deialdian gehitzen den ereduari jarraituta, proiektuak ebaluatu eta puntuatu ahal izateko horiek azaltzen eta beharrezko datuak ematen dituena.

Egutegia

Deialdia laster argitaratuko da NAOn, eta Nafarroako Gobernuaren web-orrian egongo da ikusgai.

Argitaratu ondoren, erakundeek 20 egun naturaleko epea izango dute proposamenak aurkezteko. Proposamenak aurkezteko epea amaitzen denean, hamar egun emango dira falta diren edo gaizki aurkeztutako agiriak zuzentzeko. Horren ostean, batzordeek balorazioak hasiko dituzte.

20.000 € baino gehiagoko urteko diru-laguntza edo urteko aurrekontuaren % 20 baino gehiagokoa jasotzen duten eskatzaileek erakundearen gobernu-, administrazio- eta zuzendaritza-organoen osaera, organo horiek osatzen dituzten karguen zerrenda, kargudunen ordainsari gordinak eta gainerako konpentsazio ekonomikoak, dedikazio-erregimena eta erakundearen urteko azken kontuen kopia aurkeztu beharko dituzte.  Informazio hori Nafarroako Foru Komunitateko Administrazioaren Gobernu Irekiaren Atariko web-orrian agertuko da urtebetez.  Betebehar hori bete ezean, esleitutako diru-laguntzaren ordainketa eragotziko da.

2013ko deialdia

2013ko deialdian antzerki, zirku, dantza eta musikako (lirikoa, ahotsezkoa, herrikoia eta jazza) 9 proiektu artistikok jaso zuten diru-laguntzam 1,3 milioi eurorena.

Honako hauek izan ziren erakunde onuradunak: Nafarroako Gayarre Operaren Adiskideen Elkartea, Iruñeko Ganbera Abesbatza, "El Colectivo" Nafarroako Antzerki Eskola, Nafarroako Ganbera Opera Elkartea, Nafarroako Amateur Antzerkiaren Federazioa, Diego Gómez Musika Elkartea, Arte Eszenikoen Profesionalen Elkartea (NAPAE), Nafarroako Ganbera Abesbatza eta Musika eta Arte Eszenikoen Nafarroako Foroa.

Horri esker, Foru Komunitateak jarduera artistiko zabala izan du urte osoan; 39 talde eta erakunde artistiko bultzatu eta 300 jarduera baino gehiago gauzatu ditu.